Nga Ylli Pata
Alarmi i përmbytjeve është lëshuar nga komisioni i ekspertëve që në verë por asnjëri nuk e “vuri ujin në zjarr”.
Një zyrtar i lartë i ministrisë së Bujqësisë, i cili nuk pranoi të identifikohet me emër, ka bërë të ditur për tesheshi.com se ministria e Bujqësisë e cila merret me administrimin dhe menaxhimin e ujrave nuk ka kryer asnjë punim gjatë kësaj vere për të ndalur përmbytjet e mundshme.
Siç bën të ditur zyrtari, menjëherë pas zgjedhjeve të 21 Qershorit në dikasterin e drejtuar nga Edmond Panariti është hapur çështja e rregullimit të argjinaturave, kolektorëve dhe çështjes së vendosjes në gatishmëri të hidrovorëve, por fondet ishin përdorur dhe ministria nuk kërkoi shtesë nga qeveria.
“Ekzistojnë dy shkresa ku ekipi teknik në ministri që merret me analizimin e situatws së menaxhimit të ujrave i ka kërkuar ministrit Panariti të ndërhyhet, por siç duket, drejtuesit, si gjithmonë, i kanë lënë gjërat për në fund dhe nuk kanë menduar që do të ketë reshje të mëdha në fillim të tetorit”, thotë zyrtari i lartë për tesheshi.com.
Pas të mërkurës priten reshje të mëdha shiu në të gjithë vendin dhe të gjithë tani i frikësohen një katastrofe. Mirëpo çdo vit ndodh që gjatë verës nuk pastrohen kolektorët ujwmbledhës, kanalet kulluese apo të kontrollohen kolektorët. Në fund secili institucion ia vë fajin tjetrit.
Fieri është zona me dëmet më të mëdha nga reshjet. Janë me qindra shtëpi, që u përmbytën nga lumi Gjanica, i cili këtë herë arriti deri në bulevardin e qytetit. Me shumë se 500 banesa kanë pësuar dëme, për shkak se ky lum, që kalon në mes të qytetit, është bllokuar në të gjithë rrjedhën e tij dhe nuk ka ende një projekt.
Një ditë pas vërshimit të ujërave janë evidentuar dëme të mëdha edhe në zonat rurale të Fierit. Hedhja e mbeturinave urbane nëpër kanale dhe mospastrimi kanë bërë, që ujërat të përmbytin qindra hektarë tokë në ish-komunën Dërmenas, ku më të dëmtuara janë fshatrat Dërmenas, Hoxharë e Vjetër, Shënpjetër dhe Povelçe.
Në Lushnje ka pasur përmbytje të disa banesave në qytet nga përroi i Lushnjes, si dhe shumë toka të përmbytura, por situta është mbajtur nën kontroll, për shkak se ka funksionuar sistemi i hidrovoreve. Ndërkohë, dëmet më të mëdha janë në disa parcela me produkte bujqësore, të cilat nuk kanë ende sistemin e kanalizimeve. /tesheshi.com/
