Kryeministri i Kosovës, Isa Mustafa, duke folur për raportin e tij me zëvendëskryeministrin Hashim Thaçi, tha se nuk janë rivalë në qeverisje. Ai tha se me liderin e PDK-së u morën vesh për qeverisjen e vendit, për zhvillimin ekonomik. i pyetur në lidhje me të kaluarën e tij politike,Mustafa tha se “Nuk është betejë që vazhdon. Është një marrëveshje, e cila është bërë në mënyrë që të qeveriset ky vend. Është një marrëveshje e cila ka parimet e saj, ka komponentët e saj në të cilat jemi marrë vesh si do të qeveriset vendi”, ka thënë Mustafa në emisionin ‘Shqip’ në Top Channel. “Jemi dy parti që kanë qenë rivale dhe mund të vazhdojnë të jenë rivale, por nuk do të jenë rivale në qeverisje, sepse tani është një ekip e cila duhet të funksionojë”, tha Mustafa. Kreu i ekzekutivit të vendit ka thënë se fenomeni i migrimit ilegal është zvogëluar, por nuk e ka të qartë se pse kjo ka ndodhur më intensitet kaq të lartë. Ai konsideron se emigrim ka pasur edhe më herët, por jo në këto përmasa. Problem i papunësisë është kyç, por nga ata qe e kanë lëshuar vendin ka edhe që kanë qenë në marrëdhënie pune dhe të cilët kanë pasur paga mbi nivelin mesatar. Pikërisht kjo na detyron që të bëjmë një analizë në mënyre që të dimë se çka po ndikon dhe t’i evitojmë. Unë mendoj se nuk ka arsye të humbet shpresa, sepse asnjë popull nuk e ka humbur shpresën”, ka thënë ai. Kreu i Qeverise vlerëson se as blloku paszgjedhor dhe as kjo qeveri nuk ka ndikuar qe një numër kaq i madh i njerëzve të ikin. Mustafa thotë se thyerja e xhamave të Qeverisë nga ana e qytetarëve në protesta, është art i demokracisë. Të paktën këtë, Mustafa thotë se po ua thotë ndërkombëtarëve.
“Unë po ju them këtyre ndërkombëtarëve kur po vijnë se është një art i demokracisë i autorëve të njohur dhe të panjohur”, tha Mustafa. Kryeministri Mustafa tha se qytetarët kanë të drejtë të protestojnë por se dhuna është e papapranueshme. Ai tha se qëllimi i protestave ishte rrëzimi i Qeverisë. Mustafa ripërsëriti se nuk kishte ‘tradhti’ në Bllok, por se marrëveshja që kishin ‘nuk funksionoi’.
