Kryeministri Isa Mustafa ka deklarua se duhet të tregohemi të gatshëm për t’i përmbushur obligimet dhe zotimet tona përpara drejtësisë ndërkombëtare, të cilën, në asnjë rrethanë dhe në asnjë mënyrë, nuk duhet t’i paragjykojmë si të njëanshme dhe selektive.
Ai këto komente i bëri në akademinë përkujtimore kushtuar luftëtarëve të rënë në betejën e Loxhës, ku tha se kjo betejë shquhet për organizim ushtarak dhe bashkëpunim me banorët e asaj pjese.
I pari i Qeverisë shtoi se lufta e popullit të Kosovës ka qenë luftë për liri, ka qenë luftë për ekzistencën tonë në këto troje, sepse dhuna dhe terrori serb e kishte sjellë popullin e Kosovës në një situatë hamletiane – të jesh apo të mos jesh!
Mustafa ka theksuar se po këta miq që na ndihmuan të arrinim lirinë e synuar shekuj me radhë, na inkurajojnë që të ballafaqohemi vetë me aktet e liga që mund të kenë kryer individët, që të dëshmojmë se jemi të denjë dhe të aftë për të vënë drejtësi, pa marrë parasysh se sa e dhimbshme mund të jetë kjo për secilin prej nesh.
Kosova duhet dhe është e aftë të ndërtoj një shtet të së drejtës, ta vejë drejtësinë në vend. Veç kërkesës për të zbardhur rastet për të cilat angazhohet drejtësia ndërkombëtare, ne e kemi për borxh të zbardhim të gjitha vrasjet politike të pasluftës.
Këtë ua kemi borxh viktimave, ua kemi borxh familjarëve të tyre, ua kemi borxh bashkëluftëtarëve të tyre dhe ia kemi borxh shtetit të Kosovës. Institucionet tona duhet t’i lirojmë nga arenat ku njëra palë fajëson tjetrën për vrasje dhe krime. Këto çështje duhet t’i zgjidhin organet e drejtësisë, ka thënë Mustafa./tesheshi.com/
