Ndërkohë që i mungoi një deklaratë për ngjarjet në Gaza, e kritikuar për këtë shkak nga shumë zëra besimtarësh, Komiteti Musliman i Shqipërisë ka shfaqur ndjeshmëri të fortë ndaj rastit të një abuzimi me një minorene në Rrëshën. KMSH ka mbështetur protestën e zhvilluar ditën e sotme në kryeqytet për këtë rast, ku kreu Bujar Spahiu thekson se është i papranueshëm çdo rast abuzimi ndaj gruas, gjysmës më të mirë të shoqërisë.
Spahiu thotë se raste të tilla duhen dënuar pa mëdyshjen më të vogël nga secili prej nesh dhe se e kemi detyrim të reagojmë ndaj së keqes në çdo formë që ajo shfaqet
“Është i papranueshëm çdo rast abuzimi ndaj gruas, gjysmës më të mirë të shoqërisë njerëzore. Rasti më i fundit i abuzimit me të miturën në Mirditë është tronditës.
Përveç reagimit të organeve kompetente, që duhet të jetë reagim i shpejtë dhe shembullor, i atillë duhet të jetë edhe reagimi i mbarë shoqërisë.
Raste të tilla duhen dënuar pa mëdyshjen më të vogël nga secili prej nesh, e kemi detyrim të reagojmë ndaj së keqes në çdo formë që ajo shfaqet”, shkruan njeriu në krye të KMSH-së. /tesheshi.com/
