Ish-presidenti i Egjiptit, njeriu në atë post për 30 vite, e që u rrëzua pas revoltës së 2011-s, do të mund ta shijojë lirinë brenda orëve apo ditëve të ardhshme.
Hosni Mubarak do të lërë spitalin ushtarak pas gjashtë vitesh betejë ligjore kundër akuzave për përfshirje në vrasjen e protestuesve. “Ai ka për të vajtur në shtëpinë e tij në Heliopolis,” citon Al Jazeera avokatin e ish-presidentit.
Një vendim përfundimtar i një gjykate apeli në Egjipt, që e nxori të larë Mubarakun nga përgjegjësia për përfshirje në vrasjen e protestuesve gjatë revoltës së vitit 2011, u shoqërua ditën e djeshme nga vendimi i prokurorit për dërgimin në shtëpi të tij.
Mubaraku mund të lirohet sot apo diçka më vonë, e nuk do të lejohet të largohet nga vendi për shkak të një hetimi ende në vijim për korrupsion.
Ish-presidenti u akuzua për vrasjen e protestuesve gjatë revoltës 18-ditore, ku humbën jetën 850 persona në përplasjen me forcat e sigurisë. Tanimë 88 vjeç, ai u dënua me burgim të përjetshëm pesë vite më parë; rigjykimi i çështjes solli hedhjen poshtë të akuzave dy vite më vonë.
Një tjetër president, Muhammed Mursi, i pari i zgjedhur demokratikisht në Egjipt, e që u detyrua me një puç ushtarak ta lërë detyrën, është po ashtu prapa hekurave. /tesheshi.com/
