Pjesa më e madhe e territorit shqiptar po përjeton orë apokaliptike të një moti të jashtëzakonshëm me reshje e shtrëngata. Lajmet që vijnë nga zona tyë ndryshme flasim për dalje lumenjsh nga shtrati, rrugë e toka të përmbytura, e deri në rrezikim jetësh të njerëzve.
E përmbytur është dhe autostrada Tiranë – Durrës, për herë të parë në këtë farë forme, duke bllokuar thuajse gjithë qarkullimin në këtë segment, e detyruar automjetet t’i rikthehen rrugës së vjetër.
Sipas parashikimeve, ky mot i frikshëm do vijojë dhe për orë të tjera. Por ajo që duket është se pasojat nuk do jenë të vogla sapo situata të qetësohet disi. Me gjasë, do jetë po e njëjta panoramë përmbytjesh si ato të dy viteve më parë në jug të vendit si pasojë e turfullimit të Vjosës nga prurjet e shumta, prej reshjeve gjithashtu, por që do t’i bashkangjitet kësaj here edhe veriu, e padyshim zona e Kurbinit. Kjo e fundit ishte ajo që startoi me përmbytje për sezonin e ri vjeshtoro-dimëror, duke shënuar edhe një viktimë.
Sakaq, ajo që vihet re në rrjetet sociale është publikimi i fotove me theks akuzues politik nga situata e përmbytjeve, bërë jo nga shtetas të thjeshtë por nga personazhe politike.
Në fakt, kur është fjala për përmbytje dhe gjetje fajtorësh jo natyrorë por frymorë, gishti i akuzës shkon tek të gjithë pa përjashtim: tek të gjitha qeveritë e deritanishme të të dy kahjeve politike, por dhe tek njerëzit vetë, që me përpërgjegjshmëri dhe mendjelehtësi i kanë dhënë një dorë të mirë shkatërrimit të mjedisit.
Mjaft të kujtojmë NënShkodrën, ku, edhe pse të parët kanë lënë “amanete” nga dija e përvoja që nuk mund të ndërtohet në fushë, një brez i tërë tuhafësh gjatë këtij çerekshekulli të fundit kanë shkuar e bërë shtëpi të cilat u përmbyten më pas ciklikisht. Dhe kjo ndodh edhe në zona të tjera. /teshesh.com/
