Deputeti i BDI-së, Xhevat Ademi ka komentuar vendimin e Lëvizjes BESA që mos ta mbështesë Talat Xhaferin për kryetar Kuvendi, duke e quajtur atë si jo të denjë për atë pozitë. Ai tha se BESA do të paguajë kosto politike për këtë vendim.
“Është për keqardhje, por është vendimi i tyre politik për të cilin ata mbase do të paguajnë kosto politike nga qytetari”, ka thënë Xhevat Ademi.
Nga ana tjetër, edhe deputeti dhe zëdhënës i LSDM-së, Petre Shilegov vlerëson se mospranimi i Talatit nga ana e BESËS është pjesë e demokracisë. Mirëpo, sipas tij një gjë është e sigurtë, LSDM dhe BESA janë pajtuar për demontim të regjimit të Gruevskit.
“Kjo është e mira e demokracisë, për disa çështje partitë e shumicës parlamentare mund të merren vesh ndërsa për disa mund të mos pajtohen. Por për një çëshje jemi pajtuar, ajo është demontim i regjimit të Gruevskit”, deklaroi Shilegov.
Më tutje ai njoftoi se shumica parlamentare është e vetëdijshme për përgjegjësinë që ka dhe do të merr përgjegjësinë e saj. /tesheshi.com/
