Qeveria Zvicerane vendosi të mërkurën të tërhiqet nga marrëveshja me Bashkimin Evropian për shkak të kundërshtimit të fortë në vend të këtij akti, i cili do të thjeshtonte dhe forconte lidhjet me partnerin më të madh tregtar të Zvicrës, raporton Reuters.
Qeveria arriti në përfundimin se kishte ende ndryshime të konsiderueshme midis Zvicrës dhe Bashkimit Evropian për sa i përket aspekteve kryesore të marrëveshjes.
“Prandaj, kushtet për nënshkrimin e marrëveshjes nuk janë përmbushur,” tha qeveria pas një sesioni për të diskutuar një plan për hapat e mëtejshëm mbi një bllokim të gjatë me Brukselin.
“Këshilli Federal (qeveria) mori një vendim sot për të mos nënshkruar marrëveshjen dhe informoi BE për vendimin. Kjo përfundon negociatat për draftin InstA (marrëveshje)“, thuhet në njoftim.
Dështimi në negociata
Të dy palët dështuan në një samit muajin e kaluar për të zgjidhur mosmarrëveshjet mbi një marrëveshje që përqendrohet në pesë fusha: lëvizjen e lirë të njerëzve, aviacionin civil, transportin tokësor, njohjen reciproke të standardeve të industrisë dhe mallrat e përpunuara bujqësore, kujton Reuters.
Zvicra ka insistuar në koncesione më të mëdha për çështjet e ndihmës shtetërore, rregulloret e punës dhe të drejtat e qytetarëve.
Largimi nga partneri më i madh tregtar mund të prishë dhe rrezikojë anëtarësimin e Zvicrës në tregun e përbashkët evropian, vlerëson agjencia britanike. /tesheshi.com/
