Në Maqedoni po ndiqet një tjetër politikë për subvencionimin e fermerëve dhe rritjen e prodhimit në bujqësi.
Ministria e Nujqësisë me ndihmën e ekspertëve të huaj do të përcaktojë qartë se çfarë kulturash bujqësore do të mbillen, sipas rajoneve.
Kjo mënyrë është zgjedhur për të patur sa më shumë cilësi dhe sasi.
Ndërsa në të ardhmen pritet që do të ketë edhe ndryshim të modelit të subvencionimit.
“Do të ketë rritje të subvencioneve, por edhe obligime me rezultate. Rajonalizimi do të tregojë se cilat lista prioritare kemi për rajonet e duhura dhe kjo do të jetë një argument, se në cilin drejtim do të shkojë subvencionimi”, deklaroi Lupço Nikollovski, ministër i Bujqësisë.
Inspektorati shtetëror fito-sanitar do të bëjë revizion dhe kontroll mbi atë se çfarë farash dhe preparatesh shiten në Maqedoni. Kjo, sipas fermerëve vendas, është edhe shkaku i rendimentit të keq dhe të dobët, pasi farat kanë rezultuar jocilësore dhe të dobëta. Për të pasur një cilësi të lartë dhe rendiment të unifikuar, fermerët kërkojnë revitalizimin e sistemeve të ujitjes.
“Ne kemi lidhur dhe fituar tashmë projekt për pesë sisteme të reja të ujitjes, që do të projektohen dhe ndërtohen me mbështetjen e tyre”, tha ministri.
Risia është se ekspertët sllovenë do të shkojnë në terren së bashku me këshilltarët bujqësorë, nga zyrat rajonale për mbështetje të bujqësisë.
Ata do tu ndihmojnë fermerëve për të arritur cilësi më të mirë dhe sasi në kulturat, por edhe në pjesën e dokumentacionit të nevojshëm. /tesheshi.com/
