Kishte javë që qarkullonte në rrjete, një prej atyre përtalljeve tipike shqiptare me mosmirwnjohje brenda ndaj nderit tw dikujt, e ushqyer nga portale paçavure që të emërtuara sipas një kredoje idiote që “Jeta na qenkësh qejf”, ofrojnë lajme të dala nga një çakërqejf prej të dehurish, me të cilët ushqehen të mllefosurit me Ramën, të shndërruar tashmë në ushtri të dalë mendsh, që më së pari nuk kanë respekt për veten, më dramatikja kjo.
Bëhet fjalë për sulmin e allasojshëm ndaj spitalit turk “Memorial”, i cili po ndërtohet në Fier brenda një rekordi kohor. Nuk kishte hyrë deri më sot në gojë të politikës, por hyri më në fund, dhe aty ku pritej, te personazhet tragji-komike të LSI-së, ku veçon anekdodiku Petrit Vasili.
Pasi u gjendën gafil nga një akt i pazakontë i qeverisë turke, që vendosi t’i dhurojë Shqipërisë një spital modern, por që këtë e bëri nën qeverisjen e të urryerit Rama, u sforcuan, me një mllef të mbledhur në grykë, se ku t’i gjenin yçkla. Dhe ja gjetën: spitali ngjante si stallë apo pulari!
Shihni se ç’shkruan një njeri që pretendon të jetë në qeveri nesër e të marrë në dorë fate njerëzish:
“Mashtrimi i turpshem i Rames me Spitalin e ri te Fierit!
Spitali i ri i Fierit ishte projektuar te ishte se paku nje spital normal.
Por u katandis ne nje spital fushor lufte, si nje stalle bagetish me vetem 150 shtreter nga 427 shtreter, qe ka aktualisht.
Edi Rama shkel mbi shendetesine, qe te mashtroje e te beje fushate dhe degradon çdo gje.
Fotot flasin vete shume qarte dhe askush nuk mbyll dot syte perpara tyre”.
Tani, këtu nuk është fjala të gjesh arsyetime të qashtërta për të bindur Petrit Vasilin se ja fut kot dhe deri gomarçe, pasi sido do jetë, kështu apo ashtu, me një kat apo dy a tre kate, si stallë apo si kapanon, këtë e vendosin dhuruesit, pra turqit. Ajo çfarë është kërkuar qeverisë shqiptare është thjesht vendi i ndërtimit dhe përgatitja e letrave. Kaq. Nuk është qeveria shqiptare ajo që dikton stilin e ndërtimit. Dhe është krejt normale që kur është fjala për një spital rajonal që ndërtohet ne tre muaj, stili është i thjeshtuar e jo pompoz. Ikonikja e spitalit nuk bazohet të stili arkitektural, por te standarti dhe modeli i shërbimit që do ofrojë.
Mbi të gjitha, është një çështje etike, pasi bëhet fjalë për një dhuratë. Ato që sulmojnë spitalin, siç puna e Vasilit, kësaj ikone të idiotizmit të pafre politik, duke menduar se sulmojnë Ramën, le të marrin kurajon të sulmojnë Erdoganin, apo vetë turqit, nëse dallojnë më të voglën hile në “pronton” e tyre ndaj Shqipërisë e shqiptarëve, sot e në çdo kohë për të qenë ndihmëtarë pa interes.
Por a është raporti i ngushtë Erdogan-Rama një avancim i një aleance deri në vëllazëri, kurrë me krisje apo ftohje? Patjetër që po. Po ku është problemi këtu? Rama do ikë një ditë, por spitali do të mbetet. E çfarë do bëjnë nesër ata, përfshirë dhe Petrit Vasilin, kur do duhet ta menaxhojnë atë spital – që mos e pastë kurrë këtë shans LSI apo Petrit Vasili personalisht – apo të kenë nevojë për kurim aty, te stalla apo pularia?
Sa për fotot ballafaquese të nxjerra nga Petrit Vasili, godina dy katëshe që ai e sheh në projekt e pretendon se nuk ekziston në realitet, të shkojë e t’i plasë sytë aty në kantier, se është në ngritje e sipër. /tesheshi.com/
