Nga Musa Mustafa
Mjekë serbë në veri të Kosovës dhe Mitrovicës, janë përfshirë në një lloj “krimi” karshi pacientëve – edhe pse serbë, bashkëkombas të tyre – që bie era korrupsion.
Një burim nga veriu i tha tesheshi.com se një aparat skaneri të fjalës së fundit – dhuratë e tenistit nr. 1 në botë, Gjokoviç për spitalin e veriut të të Mitrovicës – e kanë lënë në bodrum, pra pa e futur në funksion, duke i çuar pacientët për ekzaminime në Novi Pazar, 75 km larg nga Mitrovica.
E ndërkohë që një ekzaminime të tilla, në rast mungese skaneri mund të bëheshin dhe në Prishtinë, për shkak të largësisë së vogël mes dy qyteteve, afro 35 kilometra, burimi thotë se mjekët serbë nuk e pranojnë këtë.
“Mjekët e apitalit në veri të Mitrovicës iu thonë pacientëve qartazi se CT-ja nga Prishtina apo spitalet private në Kosovë, nuk pranohet; edhe pse bërja e një CT-ja në Prishtinë edhe në klinikat private kushton nga 100-150 euro”, tha burimi.
“Kjo, thotë burimi, bëhet me qëllim pasi që një fotografim në skaner kushton 200 euro në Novi Pazar, gjysmën e të cilave i merr mjeku, e pjesën tjetër laboratori që ka kryer punën”.
Millojko Miliç, banor i pjesës veriore të Mitrovicës, i tha tesheshi.com se ishte Novak Gjokoviç ai që dhuroi skanerin dhe një autoambulancë, por që aparatura që llogaritet të jetë shumë modern, është në lënë në bodrumin e spitalit.
Sipas tij, futja në funksion e këtij aparati nuk është në interes të mjekëve të korruptuar të cilët edhe pse e dinë se në spitalin shtetëror të Novi Pazarit pritet me muaj të tërë që pacientët të bëjnë një skaner – pasi duhet të bëhet shpejt për shkak të sëmundjes – atëherë ata janë të detyruar që këtë fotografim të thellë ta kryejnë në klinika private në këtë qytet dhe me kosto shumë të lartë.
“Mjekët serbë mitrovicas urdhërojnë pacientët që CT-ja të kryhet gjithsesi, pasi që nuk munden të vazhdojnë më tutje për mjekim pa këtë dokument shëndetësor, e pacientët-familjarët e tyre janë të obliguar që sa paku të paguajnë 200 euro, ka raste dhe 400 euro, duke e kryer në klinika private”.
Serbët qahen duke thënë se shumë shpesh ndodh që pacientët që janë shumë të sëmurë, të paguajnë dhe taksi deri në klinikat private të Novi Pazarit, ku edhe këtu dyshohet se përfitojnë mjekët e spitalit në veri të Mitrovicës. Ai thotë se për këtë dukuri të korrupsionit, Ministra e Shëndetësisë e qeverisë së Serbisë nën vartësinë e së cilës është spitali në fjalë, është duke heshtur.
“Qeveria e Serbisë dhe Marko Gjuriçi, krekosen se do të mbrojnë serbët e Kosovës, por realiteti është krejt ndryshe. Ata shikojnë përfitimet e tyre materiale dhe politike e fare nuk qajnë hallin për popullatën”, ka thënë një serb nga veriu i Mitrovicës që nuk ka dashur të identifikohet. /tesheshi.com/
