Nga Bashkim Kastrati
Të drejtat e profesionistëve shëndetësorë në Kosovë nuk mbrohen me ndonjë ligj të veçantë. Sipas sindikalistëve shëndetësorë, vakuumi ligjor në këtë aspekt, ka ndikuar në shtimin e rasteve të sulmeve apo edhe kërcënimeve e fyerjeve që u bëjnë atyre në vendin e punës, qoftë pacientët apo qytetarët që vizitojnë të afërmit e tyre nëpër klinika.
Sipas sindikalistëve, kjo situatë ka ndikuar që mjekët dhe stafi mbështetës të humbin besimin tek popullata dhe se kjo po ndodh pa fajin e tyre.
Por duhet theksuar se edhe disa mjekë kanë shkaktuar skandale të ndryshme në raport me pacientët, ndër më të njohurit është rasti i stendave ku disa mjekë i kanë dërguar pacientët për t’ia vendosur stendat në zëmër në klinika private edhe pa pasur fare nevojë, dhe këtë e kanë bërë në këmbim të një përqindje që e kanë marrë nga spitalet private.
Në anën tjetër, ka mjekë të ndershëm që e kryejnë punën me ndershmëri përkundër vështirësive që i kanë në institucionet shëndetësore dhe mungesa e një ligji për të drejtat e tyre për siguri në punë, ka bërë që ndaj tyre të ketë kërcënime, fyerje e nganjëherë edhe sulme fizike në vendin e punës.
“Punonjësit shëndetësor nuk kanë mbrojtje institucionale të paraparë as në kontratë pune”
Kryetari i Sindikatës së Qendrës Klinike Universitare të Kosovës, Xhemajl Selmani ka thënë për tesheshi.com se jo vetëm që nuk ka ligj për mbrojtjen e të drejtave të punonjësve shëndetësor, por punonjësi shëndetësor nuk ka mbrojtje institucionale të paraparë as në kontratë pune.
“Nuk kemi as sigurim shëndetësor se lë më sigurim në punë. Pra i kemi duart e lidhura shumëfish në raport me detyrat dhe obligimet e punës, sidomos nëse merret parasysh se në çfarë kushte po punojmë. Me mungesa të mëdha në furnizim me barëra, material harxhues, implante, mjete të punës, pajisje dhe aparatura, rreziqet e punës shtojua këtyre edhe përgjegjësinë ligjore dhe profesionale, realisht kur i mendojmë të gjitha këto, habitem se si vazhdojmë të punojmë”, thotë Selmani, duke shtuar se stafi mjekësor gjithë punën e bëjnë duke menduar pozitivisht për popullin dhe shtetin tonë se në të kundërtën nuk ka motiv për të punuar, sidomos nëse merret parasysh që stafi mjekësor ka të ardhura të vogla dhe përgjegjësi të mëdha para ligjit.
Ai thotë se sistemi shëndetësor i Kosovës është cenuar rëndë shumë herë nga sistemi i ekzekutivit dhe i drejtësisë mu për shkak të mungesës së një ligji i cili i mbron të drejtat e punonjësit shëndetësor. Ai thotë se sistemi shëndetësor është cenuar pa fakte dhe prova, publikisht dhe në mënyrë masive.
“Sistemi shëndetësor është përbaltur nëpër media të ndryshme në mënyrë sistematike. Sipas një rrjedhoje logjike, lind pyetja: Pse dhe kujt po i hyn në punë cenimi dhe përbaltja e një shtylle të rëndësishme të shtetësisë? Më së paku i hyn në punë e gjithë kjo, punonjësit shëndetësor, pjesëtarit të popullit të Kosovës dhe shtetit tonë. Si duket kjo ju intereson të gjithë armiqve të Republikës së Kosovës dhe lakmitarëve të cilët për përfitime materiale dhe meskine, harrojnë se çfarë sakrifice shekullore është bërë deri në krijimin e shtetit”, u shpreh Selmani.
Por, përderisa nuk ka një ligj që mbron mjekët në punë, pacientët gëzojnë të drejtat e tyre që u garantohen me ligj.
Sidoqoftë, në bazë të disa hulumtimeve që janë realizuar nga Shoqata për të Drejtat e Pacientëve në Kosovë, thuhet se pacientët kanë pak njohuri për të drejtat e tyre që kanë në institucione publike shëndetësore, andaj edhe brenda institucioneve jo rrallë shkelen edhe të drejtat e pacientëve dhe ata nuk e dinë se as ku dhe si të ankohen. /tesheshi.com/
