Sekretari amerikan i shtetit, Rex Tillerson paralajmëroi vendet që rivalizojnë duke përdorur Libanin të mos hyjnë në konflikte të tilla, pas krizës së nxitur nga dorëheqja e kryeministrit të vendit, Saad Hariri. Irani dhe lëvizja Shiite e Hezbollahëve që mbështetet prej tij, pretendojnë se sauditët mbajnë peng Haririn dhe e detyruan të japë dorëheqjen.
Tillerson tha se ka marrë siguri se Hariri është i lirë. Ai u dorëhoq një javë më parë në kryeqytetin e arabisë Saudite, Riad duke thënë se druhej për një komplot ndaj jetës së tij.
“Nuk ka vend të ligjshëm apo rol që mund të luajnë fuqitë e huaja, milicitë apo elementët e armatosur në shtetin e Libanit”, tha Tillerson.
Sipas tij, Shtetet e Bashkuara mbështesin fuqishëm sovranitetin dhe pavarësinë e Libanit dhe institucionet e tij politike. Tillerson inkurajoi Haririn të kthehet në vendin e tij dhe të sqarojë situatën duke bërë që të funksionojë qeveria. Ai shprehu shqetësim sesi mund të ndikojë kriza në stabilitetin e koalicionit të brishtë që qeveris shtetin e vogël.
Vonesa e përgjigjes nga ana kryediplomatit amerikan, atij iu deshën gjashtë ditë të reagonte ndaj krizës, ka rinovuar kritikat se Shtetet e Bashkuara kanë mungesë strategjie për rajonin kyç të Lindjes së Mesme. Nën drejtimin e princit të kurorës saudite, Mohammed bin Salman, ndërkaq, janë arrestuar 11 princa, katër ministra dhe dhjetëra ish-zyrtarë të lartë. Presidenti Donald Trump tha se kishte shumë besim në mbretin Salman dhe princin e kurorës së Arabisë Saudite, pasi sipas, tij ata e dinë mirë se çfarë po bëjnë. /tesheshi.com/
