Zgjedhja president e Hashim Thaçit e ka trazuar të gjithë politikën kosovare dhe po e rikthen përmbys situatën, duke afruar një bashkëpunim që do ta trondisë nga themelet skenën politike të Kosovës.
Ramush Haradinaj dhe Fatmir Limaj pritet që të afrohen edhe më shumë drejt qeverisjes, duke hyrë në kabinetin e një koalicioni të madh, e me një opozitë të fortë si Vetëvendosja.
Një burim i tesheshi.com shtoi se gjithçka ka ardhur nga një drekë në rezidencën e kryeministrit shqiptar, Edi Rama, në bregdetin e Durrësit, ku kreu i qeverisë shqiptare ka negociuar me Veton Surroin për një rikthim të tij në politikë dhe për afrim me Hashim Thaçin.
Pas atij takimi ka ndodhur dhe ndryshimi i pozicionit të Ramush Haradinajt, i cili u largua nga opozita dhe afroi qëndrimin me PDK-në. Haradinaj është takuar disa herë kohët e fundit me kryeministrin Edi Rama, dhe këtë e ka bërë të ditur edhe publikisht në rrjetet sociale.
Nga ana tjetër, mësohet se Gani Koçi, i propozuar për t’u bërë ministër i Integrimeve Europiane, nuk ka marrë pëlqimin e ambasadave perëndimore në Prishtinë. Ndërkohë që zëvendëskryeministri dhe ministri i Sporteve, Kujtim Shala, pritet të shkarkohet pas deklaratës së bërë për shkatërrimin e kishës ortodokse në qendër të Prishtinës, e cila është ndërtuar pa leje.
Po ashtu mësohet se kryeministri Isa Mustafa nuk i ka me sy të mirë dy ministra të tij, përkatësisht, Hikmete Bajramin, ministre e Zhvillimit Ekonomik, dhe Imet Rrahmanin, ministër i Shëndetësisë, të cilët pritet t’i largojë në kuadër të ribërjes tërësisht të qeverisë kosovare.
Burimi ka shtuar se PDK-ja e Kadri Veselit është duke flirtuar me AAK-në e Ramush Haradinajt dhe me Nismën e Fatmir Limajt. LDK-ja ndihet e lodhur, ndërsa Vetëvendosja tanimë është ndarë në tri grupe.
Në gjithë këtë lëmsh politik, rol kyç ka pasur një drekë “punë” në selinë e kryeministrit të Shqipërisë në qytetin bregdetar të Durrësit mes Veton Surroit e Hashim Thaçit, me ndërmjetësimin e Edi Ramës. Një takim që është zhvilluar dhjetë ditë para se Hashim Thaçi të zgjidhet president i Kosovës.
Siç ka thënë burimi i portalit tesheshi.com, sytë e të mëdhenjve janë drejtuar në tërë këtë lojë nga AKR-ja e Behgjet Pacollit, si dhe nga partia e re që pritet të formohet prej Ilir Dedës e Mimoza Kusarit. Ndërsa flitet se zgjedhjet parlamentare në Kosovë do të mbahen nga fundit i këtij viti.
Pas zgjedhjes së ministrit të Punëve të Jashtme të Kosovës, Hashim Thaçit, në postin e kreut të shtetit, qeveria e Isa Mustafës ndodhet e pakompletuar prej disa muajsh, kurse partneri i madh i koalicionit, PDK-ja, ende nuk ka mundur t’i propozojë ministrat për shkak të përplasjes së madhe brenda saj. Por edhe pasi janë bërë disa propozime, ato janë refuzuar nga ambasadorët e Kuintit.
Ambasadorët i kanë kërkuar Kadri Veselit ta rishqyrtojë këtë propozim. Përndryshe, kryeministri i Kosovës, Isa Mustafa, është nën presion të madh nga ana e përfaqësuesit të BE-së në Kosovë, Samuel Zhbogar, pasi ky i fundit i ka kërkuar shkarkimin e zëvendësministrit dhe të ministrit për Kulturë, Rini e Sporte, Kujtim Shalës.
“Objekti i Kishës Ortodokse Serbe, që është ndërtuar në oborrin e Universitetit të Prishtinës nga ana e regjimit të Slobodan Millosheviqit, e ka fatin e të gjitha objekteve të ndërtuara pa leje e që pritet të rrënohen,” ka thënë Kujtim Shala në një takim me Zhbogarin dhe me përfaqësues të Kishës Serbe.
Shala ka shtuar se, “sa të jem unë ministër për Kulturë, Rini e Sport, ky objekt kurrë nuk do të legalizohet”.
Burimi ynë thekson se këto fjalë kanë qenë fatale për Kujtim Shalën.
Por Mustafa nuk e ka shumë të lehtë ta bëjë këtë, pasi Shala ka udhëhequr lobimin e suksesshëm që çoi në pranimin e Kosovës në FIFA dhe në UEFA.
Zbutja e opozitarizmit të Ramush Haradinajt të AAK-së e të Fatmir Limajt të Nismës karshi PDK-së, e jo ndaj Isa Mustafës, po ndodh për arsye se PDK-ja e Kadri Veselit u ka ofruar atyre vende kyçe në qeverinë e ardhshme që do të krijohet pas zgjedhjeve.
Sipas burimit, PDK-ja në një marrëveshje të heshtur i ka ofruar Ramush Haradinajt postin e kryeministrit të Kosovës në zgjedhjet e ardhshme, që sipas të gjitha gjasave do të mbahen në fund të këtij viti.
Haradinaj pritet të marrë me vete edhe “Nismën për Kosovën” të Fatmir Limajt, ndërsa PDK-ja mbetet të punojë për afrimin e AKR-së së Behgjet Pacollit. /tesheshi.com/
