Miqësoret europiane të luksit kanë dhuruar spektakël me pasqyrë reale se ku ndodhen me përgatitje skuadrat para fillimit të kampionatit europian. Spanja ka triumfuar ndaj Anglisë, me dy gola që vijnë në fundin e ndeshjes, por të mjaftueshëm sa për të konkretizuar dominimin në fushë.
Nikoqirja e Europianit, Franca i ka mbajtur leksion Gjermanisë (2:0). Nga një gol në secilën pjesë të lojës u ka mjaftuar “gjelave” që të kakarisin para kampionëve të botës, që sërish nuk ishin në formën e tyre më të mirë.
Një shfaqje tejet brilante ka zhvilluar edhe kombëtarja belge që “dërmoi” Italinë (3:1). Azurët kaluan të parët në epërsi, por më pas ata u detyruan që ta ulin kokën tri herë gjatë ndeshjes, për të pësuar një disfatë të rëndë.
Ndërkohë, e befasishme ka qenë humbja e Zvicrës ndaj Sllovakisë (3:2). Helvetët madje u zhytën në tre gola në disavantazh, por me dy gola në pjesën e dytë të lojës u shpëtuan nga turpërimi.
Në duelet tjera, Turqia ka triumfuar në udhëtim ndaj Qipros (1:0), njëjtë sikurse dhe Luksemburgu ndaj Greqisë e Irlanda e Veriut ndaj Letonisë. Republika Çeke e ka bërë helaq Serbinë, duke e mposhtur bindshëm (4:1).
Një fitore të thellë ka regjistruar edhe Polonia ndaj Islandës (4:2). Holanda është këndellur me fitoren ndaj Uellsit në udhëtim (2:3), por tani tepër vonë, pasi tulipanët kanë mbetur jashtë Europianit. /tesheshi.com/
