Ministrja e Integrimit Europian, Klajda Gjosha e ka cilësuar ligjin për Vettingun si çelësi për nisjen e negociatave të Shqipërisë, në rrugën evropiane. Deklarata e saj erdhi në një konferencë të përbashkët për shtyp, me sekretarin e Përgjithshëm në Ministrinë e Jashtme të Austrisë, Michael Linhart.
“Dua t’i rikthehem domosdoshmërisë që ka implementimi i shpejtë i reformës në drejtësi, duke nisur nga ligji për vlerësimin e gjyqtarëve dhe prokurorëve, jo vetëm si çelësi për hapjen e negociatave, por si kusht për rikthimin e besimit të qytetarëve shqiptarë te sistemi i drejtësisë, si dhe investitorëve të huaj”, tha Gjosha.
Ajo falenderoi Austrinë për mbështetjen që i ka dhënë Shqipërisë. Austria së fundmi, është një nga iniciatorët e krijimit të grupit “Miqtë e Shqipërisë”, një grup që konfirmon mbështetjen e vendeve anëtare të Bashkimit Europian, për procesin e integrimit të vendit. Ministrja Gjosha u shpreh se ky grup ka një rëndësi të veçantë, pasi në këtë moment në të cilin ndodhet vendi ynë, pas marrjes së rekomandimit pozitiv për çeljen e bisedimeve për anëtarësim, mbështetja e vendeve anëtare është e domosdoshme.
“Shqipëria, nuk mund të ecë e vetme me proçesin e integrimit ka nevojë për miq, ashtu sikurse Austria ka qenë gjatë gjithë rrugëtimit tonë”, tha ministrja.
Nga ana tjetër, Linhart u shpreh se sa më herët Shqipëria të nisë negociatat me Bashkimin Europian, aq më pozitive është për vendin, ndërsa vlerësoi progresin e bërë me reformat.
“Shqipëria ka bërë progres me reformat. Austria është një partner i fortë për Shqipërinë dhe vendet e Ballkanit Perëndimor. Është e rëndësishme të theksohet se për integrimin gjithçka varet nga Shqipëria, dhe përpjekjet konkrete për zbatimin e reformës në drejtësi. Do të jemi në favor të hapjes së negociatave për anëtarësim të Shqipërisë në BE në dhjetor. Do të përpiqemi të bindim partnerët tanë për të mbajtur një qëndrim pozitiv për këtë”, tha Linhart.
Ministrja Gjosha, duke iu referuar investimeve austriake në vend me rreth 50 projekte, veçanërisht në fushën e turizmit, shëndetëse, apo furnizimi me ujë të pijshëm, theksoi se Shqipëria ka nevojë për investitorët e huaj./tesheshi.com
