Pas shkrimeve të botuara para zgjedhjeve vendore, por edhe ditën e djeshme në portalin tesheshi.com, mbi mundësitë e rikonfigurimit të kabinetit qeveritar, këto zëra janë konfirmuar edhe nga media të rëndësishme kombëtare siç është televizioni Top Channel.
Në një kronikë mbi mbledhjen e sotme të qeverisë që është zhvilluar në Malin e Dajtit, Top Channel thekson se Rama ka kërkuar të bëhet analiza e hollësishme e çdo dikasteri me detaje.
Gjithçka do të bëhet për një muaj deri në mbledhjen e ardhshme në fund të gushtit kur të jetë gati analiza e plotë.
Në kronikën e saj, TCH, thekson ndërmjet të tjerave, se takimi i ministrave në Dajt është mbledhja e fundit e qeverisë për këtë sezon përpara rimbledhjes së saj në fund të gushtit.
Në këtë mbledhje të kabinetit qeverisës, në fokus është analiza e qeverisjes në këtë sesion parlamentar që u mbyll. Mbledhja disaorëshe në Dajt, do të ketë në fokus gjithashtu prioritetet për sesionin parlamentar të vjeshtës.
Mbledhja e qeverisë bëhet në kohën kur janë intensifikuar zërat për ndryshime jo vetëm emrash në kabinet, por edhe të portofoleve që mbajnë PS e LSI në të.
Në kuadër të reformës në drejtësi, që është edhe nisma më e rëndësishme e mazhorancës në pjesën e mbetur të vitit, kanë qenë të pranishme gjithmonë e më shumë aludimet mediatike, se Ministria e Drejtësisë do të mbahet pas vjeshtës nga Partia Socialiste, për t’i lënë LSI-në një tjetër dikaster qeveritar.
Kryetari i LSI-së, nuk ka qenë asnjëherë mohues ndaj këtyre ndryshimeve, ndërsa kryeministri asnjëherë pohues për ndryshime të mundshme të qeverisë në vjeshtë.
/tesheshi.com/
