Nga Bashkim Kastrati
Ministria e Bujqësisë para disa ditëve ka publikuar listat e përfituesve për vitin 2017. Ndarja e granteve është bërë për kultura të ndryshme si pemë dhe perime, serra, investime në stalla, ujitjen e tokave etj.
Por edhe këtë vit janë refuzuar një pjesë e madhe e fermerëve pa ju shqyrtuar fare projektet. Sipas një reagimi të organizatës Çohu! e cila ka bërë disa hulumtime mbi ndarjen e granteve, këtë vit refuzimi ka qenë edhe më i madh se sa viteve paraprake.
Kur është ngritur ky problem vitin e kaluar, zyrtarë të Ministrisë së Bujqësisë patën deklaruar se ky refuzim ka ndodhur për shkak se pjesa më e madhe e fermerëve kanë aplikuar në ditën e fundit dhe se refuzime të tilla nuk do të ndodhin më.
Gjithashtu edhe Ministri i Bujqësisë Memli Krasniqi gjatë një interviste në emisionin “Puls” të KTV-së ka deklaruar se refuzime të tilla kanë ndodhur në vitin 2015, por nuk do të përsëritën më.
Por sipas të dhënave të organizatës Çohu rastet e refuzimit pa ju shqyrtuar fare projektet, jo që nuk janë përsëritur, por në vitin 2017 numri i atyre që janë refuzuar në këtë mënyrë është rritur.
“Ministria e Bujqësisë, Pylltarisë dhe Zhvillimit Rural (MBPZHR) vazhdon të refuzojë padrejtësisht fermerët që aplikojnë 
për grante pa ua shqyrtuar fare projektet. Ky refuzim bëhet me arsyetimin se fermerët që kanë aplikuar nuk i kanë të gjitha dokumentet e kompletuara, e që janë përcaktuara me Udhëzuesin për Aplikues. Por është pikërisht ky Udhëzues për Aplikues që e ndalon një refuzim të tillë. Në faqen 26 të këtij udhëzuesi shkruan se: “Në rast të mungesës së ndonjë dokumenti të detyrueshëm, zyrtari i AZHB-së (Agjencisë për Zhvillimin e Bujqësisë e cila funksionin në kuadër të MBPZHR-së) nuk e pranon aplikacionin. Aplikuesi ka afat deri në përfundim të thirrjes për aplikim që t’i kompletojë dokumentet”, thuhet në reagimin e organizatës Çohu!
Sipas kësaj organizate, edhe më skandaloz është fakti se në momentin kur fermerët aplikojnë, atyre u lëshohet një dokument nga zyrtarët e AZHB-së se të gjitha dokumentet i kanë të kompletuara. Por kur shpallen përfituesit, ata refuzohen për mungesë të ndonjë dokumenti.
“Në një hulumtim të Qendrës Kosovare për Gazetari Hulumtuese – Preportr, e cila funksionon në kuadër të organizatës ÇOHU! është gjetur se fermerët refuzohen edhe në rastet kur u mungon një kopje e letërnjoftimit, apo kopja e xhirollogarisë. Pasojat më të mëdha po i vuajnë fermerët, të cilët paguajnë deri në 500 euro për të përgatitur një projekt dhe refuzohen për shkaqe të tilla. Pra ka fermer që refuzohet për disa vite radhazi dhe përveç se nuk përfiton asgjë, ai humb kohën dhe mjete financiare për çdo vit”, thuhet në reagim.
Në bazë të listave zyrtare të publikuara nga AZHB, rezulton se:
Në vitin 2015 kanë aplikuar 2119 fermerë, janë refuzuar 950 apo 44.83 %
Në vitin 2016 kanë aplikuar 1015 fermerë, janë refuzuar 370 apo 36.45%
Në vitin 2017 kanë aplikuar 914 fermerë, janë refuzuar 507 apo 55.47%
Organizata ÇOHU! konsideron se një refuzim i tillë është i padrejtë, joligjor dhe dëmton shumë fermerët. Ky trend i refuzimit të fermerëve nxitë dyshime se kjo po ndodh për të eliminuar konkurrencën dhe grantet t’i përfitojnë ata që janë të favorizuar nga MBPZHR.
Organizata ÇOHU! i bën thirrje MBPZHR-së që të ndalojë një praktikë të tillë të refuzimit të fermerëve, ndërsa fton prokurorinë e shtetit që të hetojë këtë rast.
Bujqit po dëmtohen më së shumti
Tahir Tahiri kryetari i Federatës Sindikale të Bujqve të Kosovës, ka thënë për tesheshi.com se refuzimet e tilla përbëjnë shkelje ligjore dhe se këto refuzime po ndodhin në vazhdimësi dhe në këtë mënyrë po dëmtohen bujqit e Kosovës.
“Është e vërtetë që në Ministrinë e Bujqsise ka shumë parregullsi të tilla, dhe kjo dukuri nuk ka ndodhur për herë të parë këtë vit, por ata prej vitit 2008 bëjnë veprime të tilla. Mirëpo këto dy-tri vitet e fundit, me të madhe bëjnë shkelje të tilla dhe jo vetëm të tilla, por edhe shumë keqpërdorime tjera, me çka e kanë “shtrirë për toke” sektorin e bujqësisë dhe bujkun kosovar”, thotë Tahiri./tesheshi.com/
