Turqia vijon të kërkojë dëshpërimisht nga SHBA-ja ekstradimin e njeriut përgjegjës për grushtin e dështuar të shtetit të korrikut të 2016-s.
Kërkesë e cila ra në vesh të shurdhër për shumë muaj, gjersa në pushtet ishte administrata e Obama-s; veç të tjerash, kjo ishte një prej arsyeve kryesore të ftohjes së marrëdhënieve mes dy aleatëve.
Me marrjen e presidencës së Trump-it, në Turqi janë shtuar shpresat se ekstradimi i Fethullah Gülen-it mund të bëhet realitet. Ekstradimi i tij është një prej kushteve të Turqisë për përmirësimin e bashkëpunimit dypalësh.
Ministri turk i Drejtësisë, Bekir Bozdağ, i ka dërguar një letër homologut të tij amerikan, Jeff Sessions, ku i uron emërimin në detyrën e re dhe i kërkon ekstradimin e Gülen-it.
Daily Sabah u referohet burimeve ministrore kur raporton se në letër është kujtuar se procesi i ekstradimit të udhëheqësit të FETÖ-s mbetet çështja kryesore midis dy dikastereve. Turqia, shkruan në letër Bozdağ, pret që aleati ta kthejë Gülen-in, pasi ai është një kërcënim kombëtar për vendin.
Ekstradimi i njeriut që organizoi grushtin e dështuar të shtetit është diskutuar dhe në bisedën telefonike të fillimshkurtit midis presidentëve Erdoğan dhe Trump. /tesheshi.com/
