Ministri rus i Ekonomisë, Alexei Ulyukayev, ka dhënë një intervistë për televizionin shtetëror rus, ku ka përdorur tone më të buta kur ka folur për marrëdhëniet me Turqinë.
Siç njofton agjencia e lajmeve Reuters, ai e ka quajtur Turqinë një partner të rëndësishëm tregtar, e ka nënvizuar se Moska kërkon t’i minimizojë problemet për bizneset turke dhe ruse të shkaktuara nga sanksionet.
“Turqia mbetet partneri ynë i madh tregtar. Embargoja jonë është përzgjedhëse, shumë përzgjedhëse…,” ka thënë Ulyukayev-i. Duke vazhduar më tej, “Ne nuk duam të krijojmë probleme për biznesin turk, e aq më pak për biznesin dhe qytetarët tanë.”
Në të njëjtën kohë, sipas së përditshmes turke Habertürk, Rusia i ka përjashtuar dhjetë prej markave turke prej sanksioneve. Mes kompanive që nuk do të jenë në listën e sanksioneve gjenden Colin’s, LC Waikiki, Defacto, Koton e Anadolu Efes.
Që prej incidentit të rrëzimit të avionit rus muajin e shkuar, Moska ka vënë sanksione ekonomike ndaj Turqisë. Vetëm një ditë më parë presidenti Putin nënshkroi një dekret që i zgjeronte ato, por duke kërkuar përpilimin e një liste të përjashtimeve prej sanksioneve. /tesheshi.com/
