Ministri i Jashtëm i Arabisë Saudite, Adil el-Xhubejri, gjendet për një vizitë në Turqi, ku veç takimeve me personalitetet kryesore të vendit, ka marrë pjesë sot dhe në një panel mbi marrëdhëniet saudito-turke.
Duke folur në këtë panel, el-Xhubejri ka thënë se vendi i tij e përkrah operacionin e ushtrisë turke, “Mburoja e Eufratit”, në veri të Sirisë.
“Ne e mbështesim atë që po bën sot Turqia në Siri. Unë besoj se synimet e Turqisë dhe të Arabisë Saudite në rajon janë thuajse të njëjta,” është shprehur në panel kryediplomati saudit.
“Ne mbështesim çdo lëvizje që ndihmon në eliminimin e organizatës terroriste DAESH në Siri e kudo tjetër në rajon,” ka shtuar ai.
Gjithnjë në kuadër të bashkëpunimit të Arabisë Saudite me Turqinë, duke kujtuar se dy vendet janë aleatë e partnerë prej dekadash, Adil el-Xhubejri ka nënvizuar, “Ne po punojmë shumë ngushtë mbi krizën siriane, dhe e mbështesim opozitën e moderuar atje. Po punojmë shumë ngushtë për zmbrapsjen e sektarizmit dhe të politikave sektare në rajon.” /tesheshi.com/
