Ministri i Jashtëm estonez, Sven Mikser, vendi i të cilit mban aktualisht presidencën gjashtë-mujore të Bashkimit Europian, kritikoi politikanët gjermanë të mërkurën për politizimin e marrëdhënieve BE-Turqi, si pjesë e fushatave të tyre përpara zgjedhjeve parlamentare më 24 shtator.
Në një intervistë me radio publike gjermane Deutschlandfunk, Mikser theksoi rëndësinë strategjike të Turqisë për BE-në dhe kërkoi kujdes në debatin e nxehtë lidhur me përfundimin e bisedimeve për anëtarësimin e Turqisë.
“Të gjitha vendimet për të ardhmen e marrëdhënieve BE-Turqi duhet të konsiderohen me shumë kujdes dhe nuk duhet të bëhen gjatë fushatave zgjedhore”, tha ai, duke theksuar rëndësinë e Turqisë si një partner strategjik në shumë fusha.
Kancelarja gjermane Angela Merkel, e cila po rikandidon për zgjedhje, u vu nën presion të madh nga rivalët e saj kohët e fundit, dhe premtoi të martën për rritjen e mundësisë së pezullimit ose përfundimit të bisedimeve rreth anëtarësimit të Turqisë në BE, në diskutimet me homologët e saj.
Rivali i saj kryesor, udhëheqësi i Partisë Social Demokratike (SPD), Martin Schulz, kërkoi të ndalojë menjëherë bisedimet e anëtarësimit të Ankarasë në BE dhe ngrirjen e 4 miliardë eurove në fondet e paraaderimit.
Por Mikser paralajmëroi kundër vendimeve të nxituara mbi lidhjet e ardhshme midis BE dhe Turqisë mes tensioneve të fundit midis Ankarasë dhe Evropës.
Lidhjet midis Ankarasë dhe kryeqyteteve evropiane u tensionuan që nga përpjekja e grushtit të shtetit në Turqi në vitin e kaluar, pasi Ankaraja i akuzoi se pse nuk u deklaruan kundër grusht-shtetasve.
Politikanët turq gjithashtu kanë kritikuar Gjermaninë, Belgjikën, Holandën dhe disa vende të tjera evropiane se kanë mbyllur sytë ndaj grupeve të jashtëligjshme dhe organizatave terroriste që janë armiqësore ndaj Turqisë.
Mikser, megjithatë, nënvizoi se Turqia ishte një “partner i domosdoshëm” i BE-së në trajtimin e krizës së migracionit.
“Si BE, ne gjithashtu kemi lidhje shumë të rëndësishme tregtare me Turqinë, gjithashtu Turqia është një aktor kyç në lidhje me situatën e sigurisë në rajon dhe përveç kësaj, është një nga aleatët tanë më të fuqishëm dhe më të përgatitur ushtarakisht në NATO”, tha ai. /tesheshi.com/
