Një rezolutë e miratuar nga Këshilli i Sigurimit i OKB-së e që i dënon ngulimet izraelite në territoret e pushtuara palestineze ka ngjallur zemërim të madh te autoritetet e Izraelit. Kësaj i shtohet dhe pezmi për një konferencë që do të mbahet në janar në Paris, me synimin për t’i rivënë në lëvizje përpjekjet për paqe midis izraelitëve dhe palestinezëve.
Izraeli e ka kundërshtuar fort konferencën e 15 janarit të organizuar nga Franca, ku do të marrin pjesë përfaqësues nga 70 vende, duuke bërë thirrje për bisedime të drejtpërdrejta me palestinezët.
Në këtë kuadër ka reaguar dhe ministri izraelit i Mbrojtjes, Avigdor Lieberman, që u ka thënë anëtarëve të partisë së tij, Yisrael Beitenu: “Kjo nuk është një konferencë paqeje. Eshtë një gjyq kundër Izraelit.”
Lieberman, i njohur për qëndrimet e tij radikale, ka shkuar më tej, duke u kërkuar hebrenjve në Francë të largohen për në Izrael, si përgjigjja më e përshtatshme dhe e vetmja që mund t’i jepet kësaj konference.
“Mund të jetë koha për t’u thënë hebrenjve të Francës: “Ky nuk është vendi juaj, nuk është toka juaj, lëreni Francën dhe hajdeni në Izrael.”
“Nëse doni të mbeteni hebrenj dhe t’i mbani hebrenj fëmijët dhe nipërit e mbesat tuaja, lëreni Francën dhe lëvizni për në Izrael,” kanë qenë fjalët e Lieberman-it. /tesheshi.com/
