Ministri i Jashtëm i sllovak, Lajçak: Ja pse ishim kundër Kosovës në UNESCO

Ministri i Jashtëm i Sllovakisë, Miroslav Lajçak, ka bërë me dije se shteti i tij ka votuar kundër pranimit të Kosovës në UNESCO sepse bota nga Prishtina dhe Beogradi pret që propozimet e tilla të jenë pjesë e marrëveshjes së ndërsjellë.

Ai ka thënë se Prishtina dhe Beogradi duhet të sillen si dikur Çekia dhe Sllovakia. “Duam që partnerët (Kosova dhe Serbia) ta interpretojnë si një lloj mesazhi se bashkësia ndërkombëtare pret prej tyre që propozimet e tilla t’i paraqesin në bazë të marrëveshjes së ndërsjellë dhe me pajtueshmëri të ndërsjellë, ashtu siç e bënin dikur këtë Çekia dhe Sllovakia”, ka thënë Lajçak gjatë vizitë në Bosnje e Hercegovinë, transmeton “KosovaPress”.

Ministri sllovak ka porositur se çështjet e ndërlikuara dhe të ndjeshme duhet të zgjidhen në kuadër të dialogut të Prishtinës dhe Beogradit për normalizimin e marrëdhënieve. Lajçaku ka thënë se interesi i Sllovakisë është që dialogun Kosovë – Serbi ta përforcojnë. “Një nga arsyet pse morëm qëndrim negativ është ajo se tema në fjalë s’ka qenë pjesë e dialogut dhe druajmë se do të mund ta keqësonte situatën”, ka thënë Lajçak.

Votimi kundër pranimit të Kosovës në UNESCO, sipas tij, është në pajtim me qëndrimin e Sllovakisë për mosnjohjen e pavarësisë së Kosovës, porse nuk është qëndrim armiqësor ndaj Kosovës. “Sllovakia e ka përkrahur apo të paktën s’e ka penguar integrimin. Njëkohësisht flasim për rolin e rëndësishëm të dialogut ndërmjet Beogradit dhe Prishtinës”, ka deklaruar Lajçak. /tesheshi.com/