Ministri i Jashtëm grek: Do të propozoj një paketë për të mbyllur sherrin me Tiranën

Ministri i Jashtëm i Greqisë, Nikos Kotzias, ka deklaruar se do të vijë në Tiranë në fund të qershorit me një paketë propozimesh për marrëveshjen detare dhe zonën ekskluzive ekonomike, gjë që mban peng marrëhëniet mes dy vendeve. Duke folur në një debat në Saint Antony’s College të Universitetit të Oksfordit, shefi i diplomacisë greke ka folur edhe për marrëdhëniet e vendit të tij me vendet fqinj, njofton ResPublica. “Me Shqipërinë në lidh një e kaluar e përbashkët e pasur, ëndërra dhe perspektiva të përbashkëta: Ekzistojnë edhe shumë probleme nga e kaluara, por edhe për shkak të pikëpamjeve të një pjese të lidershipit të vendit fqinj, kanë ngecur disa projekte si mos zbatimi i pakteve për të cilat është rënë dakord, kundërshtimi i zbatimit të dispozitave të së drejtës ndërkombëtare, të drejtat e minoritetit grek. Ne kemi predispozicionin t’i zgjidhim problemet dhe të kapërcejmë çdo vështirësi. Planifikojmë të propozojmë ditët e ardhshme një zgjidhje paketë për të gjitha problemet, që do të jetë realiste, shpresëdhënëse dhe në dobi të të dy popujve”, raportohet të ketë deklaruar Kotzias që pritet të nisë një tur në rajon.