Tritan Shehu, një nga deputetët më të rëndësishëm të opozitës, ish-kryetar i PD-së dhe ish-ministër i Jashtëm, ka akuzuar sot në Kuvend qeverinë se ka votuar pro Jerusalemit kryeqytet të Palestinës, gjatë samitit të Organizatës së Bashkëpunimit Islam në Stamboll, pa përcaktuar një qëndrim në Kuvend.
E menjëhershme ka qenë replika e shefit të diplomacisë shqiptare, Ditmir Bushati, i cili ka bërë të ditur se qëndrimi i qeverisë shqiptare për Palestinën është ai që ka votuar në vitin 2014, pra që e njeh shtetin e Palestinës.
Bushati tha se këtë qëndrim ka edhe BE e OKB-ja.
“Nëse i referoheni vitit 1967, mund t’ju them se ka 4 rezoluta detyruese të Këshillit të Sigurimit. Mbi bazën e Kartës së OKB-së, Këshilli i Sigurimit ka rezoluta detyruese. Ky është qëndrimi i Bashkimit Evropian. Ky ka qenë tradicionalisht qëndrimi i Shqipërisë. Persona të ndryshëm më kanë pyetur përse nuk jemi shprehur. Por unë mund t’ju them që kjo qeveri nuk vuan nga gjigandomania që për çfarëdo lloj gjëje që shfaqet, qeveria të dalë me një qëndrim, duke pasur parasysh se qëndrimi i qeverisë shqiptare në këtë rast është ai qëndrim i pandryshuar ndër vite, i reflektuar tek vota jonë në OKB, në linjë me qëndrimin e Bashkimit Evropian. Ka 4 rezoluta zoti Shehu.
Nuk ka një qëndrim të ri nga ana e Shqipërisë. E kemi bërë këtë diskutim edhe për Palestinën në OKB me shumë prej jush. Është i njëjti qëndrim që Shqipëria ka mbajtur në OKB, në lidhje me 4 rezoluta të Këshillit të Sigurimit, rezoluta detyruese që i referohen 1967-s, në përputhje me linjëzimin tonë të politikës së jashtme 100% me atë të Bashkimit Evropian.
E përsëris edhe një herë, thjesht për informacionin tuaj dhe kërshëri shkencore: në Organizatën e Bashkëpunimit Islamik nuk votohet”, tha Bushati. /tesheshi.com/
