“Do të ishte jo-kushtetuese që Franca të kalojë ligjin për ndalimin e burkinit, dhe një veprim i tillë mund të shkaktonte dëme të pariparueshme”, paralajmëroi kështu Ministri i Brendshëm francez, Bernard Cazeneuve.
Duke folur për të përditshmën franceze La Croix, Cazeneuve përsëriti kundërshtimin e qeverisë për nxjerrjen e një ligji në lidhje me këtë çështje, e cila ka ngjallur debat të ashpër si në brenda ashtu edhe jashtë vendit në lidhje me të drejtat e grave dhe sekularizmin strikt të Francës.
Rreth 30 vendpushime bregdetare kanë ndaluar së fundmi gratë nga veshja e një kostumi që mbulon gjithë trupin në plazh, edhe pse gjykata më e lartë administrative e Francës të premten er përmbysi këtë masë në njërin qytet, me një vendim i cili me gjasë do të shërbejë si precedent ligjor edhe për qytetet tjera.
Politikanët djathtistë, të udhëhequr nga Nicolas Sarkozy i cili javën e kaluar paralajmëroi kandidaturën e tij për president të vendit, po bëjnë presion që një ndalim i tillë i cili do të vlejë për gjithë vendin, të jetë i shkruar në ligj.
Por Cazeneuve përjashtoi një veprim të tillë.
“Siç ka thënë edhe kryeministri, qeveria refuzon që të nxjerrë ligje për këtë çështje, sepse çdo ligj i tillë do të ishte antikushtetues, joefektiv dhe me gjasë do të shkaktonte tensione të pariparueshme”, tha ai.
“Megjithatë, muslimanët duhet të vazhdojnë të angazhohen me ne në lidhje me çështjet e barazisë gjinore, natyrën e paprekur të parimeve të Republikës së Francës dhe tolerancën, në mënyrë që të bashkëjetojmë në paqe”, tha ai, duke vënë në pah se në anulimin e ndalimit të burkinit, gjykata në fakt veçse e “kishte cituar ligjin”.
Ai po ashtu sulmoi opozitën e cila po përpiqet që të fitojë avantazhe politike nga këto polemika, në një kohë kur vendi është tronditur nga një seri sulmesh vdekjeprurëse, të pretenduara nga militantët e Shtetit Islamik.
“Disa udhëheqës opozitarë janë duke bërë shumë zhurmë. Ata po mendojnë se në kontekstin aktual të kërcënimeve terroriste, ne mund të braktisim parimet themelore të ligjit ashtu siç parashikohen në Kushtetutë”, tha ai, duke paralajmëruar se një veprim i tillë do të ishte “një gabim serioz”. /tesheshi.com/
