Ministrat teknikë të propozuar nga Partia Demokratike, pas marrëveshjes së 18 Majit mes Kryeministrit Edi Rama dhe Kreut të PD-së, Lulzim Basha, duket se po përgatiten të lënë postet ministrore.
Si hap të parë, përpara dorëheqjeve, që duket se nuk do të vonojnë, ministrat teknikë po delegojnë kompetencat te zv.ministrat, që janë përfaqësues të Partisë Socialiste.
Kështu mësohet se ministrja e Financave, Helga Vukaj ka firmosur 13 urdhra ku i delegon 13 kompetenca të ndryshme zv.ministrit Erjon Luci, përfaqësues i Partisë Socialiste.
Gjithashtu ministrja teknike e Mirëqënies Sociale, Xhulieta Kërtusha ka firmosur një urdhër ku autorizon një person të jetë firmëtari i institucionit për të gjitha tenderët e kësaj ministrie.
Ajo që bie në sy, është se delegimi i kompetencave është për deri në 31 dhjetor të këtij viti.
Personi i autorizuar nga teknikja Kërtusha është Elird Qëndro, me detyrë Drejtor i Përgjithshëm i Shërbimeve Mbështetëse.
Burime nga Partia Demokratike bënë të ditur për tesheshi.com se brenda pak ditësh ministrat teknikë do të dorëhiqen, ndërsa qëndrimi i tyre në detyrë edhe pas zgjedhjeve të 25 Qershorit është argumentuar me përgatitjen e një raporti mbi proçesin zgjedhor të 25 Qershorit. /tesheshi.com/
