Duke iu përgjigjur zhurmës së krijuar së fundi nga përzgjedhjet e ministrave të rinj, kryeministri Rama i mbrojti ata duke u dalë garantë për zotësinë.
“Ministrat e rinj janë më me eksperiencë sesa ata që u larguan dhe që ishin në ditën e parë të qeverisë në 2013-ën. Sepse askush prej atyre nuk vjen nga bankat e opozitës, apo politikës, por nga eksperienca të mirëfillta pune. Kam shumë besim që puna do të tregojë dobinë e gjithë këtyre zgjedhjeve dhe padiskutim në çdo rast ata këshilltarët publikë do të bënin detyrat e tyre. Po të ishin të gjithë politikë do thonin ku janë ata njerëzit e ndryshimit, njerëzit pa parti. Të gjithë ata që janë zgjedhur për qeverinë e re janë njerëz që jo vetëm kanë kapacitetet e tyre të padiskutueshme, por kanë një sens përkatësie ndaj vizionit, programit dhe mënyrës së të qenit në PS, pavarësisht nëse kanë apo jo kartë anëtarësie”, tha Rama, përgjatë një konference për shtyp në kuadër të mbylljes së vitit.
Siç dihet tashmë, për ministër të Jashtëm, Rama zgjodhi një kosovar, Genti Cakajn, e rreth këtij të fundit janë rrotulluar debatet dhe kontestimet kryesore. /tesheshi.com/
