Duke komentuar deklarimet më të fundit të ambasadorit Lu, ato ku paralajmëroi dhe kapjen e peshqve të mëdhenj në fillim të 2018-ës, ish-ministri i Jashtëm Paskal Milo, njëherësh kreu i Demokracisë Sociale, tha se të huajt i kanë gati dosjet e politikanëvve të lartë shqiptarë.
“As nuk e imagjinoni sa dosje kanë shtetet e tjera, kanë një mal me dosje për lidhje me krimin dhe fenomene të krimit. Vështirë se mund të ketë ndonjë dosje pas 1996 e nivelit të lartë politik shqiptar që të mos jetë e ngarkuar me informacione dhe fakte për lidhje korruptive dhe kriminale. Unë kam pasur rastin të bisedoj me ambasadorë amerikanë në të kaluarën dhe të vendeve të BE e me homologë të mi, të cilët herë pas here më kanë informuar për natyrën e këtyre dosjeve dhe për emra të veçantë të politikës shqiptare. Sot jam jashtë politikës ekzekutive që nga 2002 dhe kushedi ato dosje si mund të jenë bërë. Aq më tepër që intensiteti i lidhjeve mes krimit të organizuar dhe politikës vitet e fundit ka marrë përmasa galopante”, tha Milo i ftuar në Report Tv.
Por politikani-historian, edhe pse theksoi se dosjet i përkasin nivelit më të lartë të politikës, nuk tha se në ç’kah të politikës janë ato më të bujshmet të cilat pritet të trondisin opinionin, siç paralajmëroi ambasadori Lu, në fillimin e vitit të ardhshëm, pra pas dy muajsh. Vetë Milo ka qenë pjesë e së majtës. /tesheshi.com/
