Nga Mensur Krasniqi
Përballja e Shkëndijës së Tetovës me Milanin e madh, ka bërë që shqiptarët të futen në një sprovë shpirtërore ku ndjenjat e preferencave futbollistike të ngatërrohen keqazi me ato atdhetare. Ja, kush duhet mbështetur, Milani i zemrës apo Shkëndija po aq e zemrës edhe për shkak të thirrjes së gjakut?
Lidhur me këto dilema është hapur debat i madh si në rrjete sociale ashtu edhe nëpër rrugë, se a mund të quhet “tradhëtar” një milanist shqiptar nëse sot nuk bën tifo për Shkëndinë.
Por cili është vlerësimi i sportistëve të vërtetë shqiptarë? Ccfarë mendojnë ata? A duhet të shkohet me akuza ekstreme të tipit “tradhëtar” apo sporti nuk njeh fe dhe komb?
Sipas Sedat Berishës, futbollist aktiv i ekipit të Shkupit në ligën e parë të Maqedonisë, duke marrë parasysh momentin historik të Shkëndisë në arenën ndërkombëtare, sot gjithë shqiptarët, përfshirë këtu edhe milanistët duhet të mbështesin Shkëndinë.
“Sigurisht që të gjithë shqiptarët anembanë sot janë me vëmendje te ndeshja në “San Siro” ndërmjet Milanit dhe Shkëndisë. Unë jam i mendimit që të paktën sot kur e dimë se Shkëndija mund të shënon historinë duke u kualifikuar në grupe të Liga Evropës edhe atë duke eliminuar Milanin e madh, të gjithë ne pavarësisht faktit që mund të jemi tifoz të Milanit në arenën ndërkombëtare, ta përkrahim Shkëndinë. Si asnjëherë më parë Shkëndija ka nevojë për mbështetje, ndryshe Milani është klub i madh dhe vështirë t’ia dalësh me ta”, deklaroi për tesheshi.com futbollisti Sedat Berisha.
Ndërkohë që për Ertan Demirin, ish-futbollist dhe menaxher i futbollit, lëre që duhet bërë tifo për Shkëndinë, por të njëjtit nuk duhet t’i harruar edhe në lutjet tona në mënyrë që ata ta shënojnë historinë shqiptare të futbollit në Maqedoni.
“Për mua as duhet diskutuar se për kë duhet të bëjmë tifo sonte. Lëre që duhet të bëjmë tifo për Shkëndinë por duhet edhe të lutemi për ta që të kenë fat dhe paraqitje sa më të mirë dhe dhashtë Zoti të kualifikohen në grupe duke eliminuar një gjigand siç është Milani. E di që ka milanist shqiptarë që do e kenë vështirë, por sot gjithë shqiptarët do bëjmë tifo për Shkëndinë dhe Skënderbeun. Ndonjëherë ka pasur raste që kam lexuar tifozë të Barcelonës në arenën ndërkombëtare të bëjnë tifo për Realin, gjithçka mvarret nga mentaliteti kombëtar”, deklaroi për tesheshi.com Ertan Demiri.
Ndryshe nga dy bashkëbiseduesit e parë, gazetari Bekim Laçi, njohës i mirë i sportit të futbollit, nuk pajtohet më ndërlidhshmërinë e elementit kombëtarë dhe fetarë në aspektin e tifozerisë.
“Shumë interesant është konteksti politik në shtet, te ne ende ekipet sportive fatkeqësisht ndahen në ekipe shqiptare dhe maqedone. Mirëpo nga ana tjetër në tërë botën kultura e tifozit është se tifozi e përkrah ekipin lokal dhe i gëzohet humbjeve të rivalit sportiv në arrenën ndërkombëtare pavarësisht se janë të njëjtit komb. Është e paimagjinueshme që një tifoz i Chelseat me ju gëzu suksesit të Totenhamit në garën ndërkombëtare pavarësisht se dy klubet janë angleze. Ka dhe raste tjera ku p.sh. një ekip anglez në formacionin e parë nuk ka asnjë anglez, ata që moti i kanë thyer tabut kombëtare dhe fetare. Ne nuk mund të themi që jemi më fanatik se ata si popull kur bëhet fjalë futbolli. Ata jetojnë për futboll”, u shpreh për tesheshi.com Bekim Laçi. /tesheshi.com/
