Nga Bekim Laçi
Një protestë e madhe është zhvilluar në Shkup sot pasdite ku mijëra shqiptarë kanë kundërshtuar politikën aktuale dhe kërkuar largimin e qeverisë.
Organizatori, lëvizja politike Besa prezencën e vetëm qytetarëve shqiptarë e arsyetoi me faktin se bëhet fjalë për nevojën e artikulimit të zërit shqiptarë nëpërmjet kërkesave siç janë: Dorëheqja e qeverisë Gruevski- Ahmeti, zbardhja e të vërtetave të rasteve në të cilat kanë pësuar shqiptarët dhe kanë kërkuar marëveshje ridefinimi për Maqedoninë.
Anëtari i Këshillit Koordinues të Lëvizjes BESA, Skender Rexhepi tha se prania e një numri kaq të madh njrëzish dëshmon se Këshilli Organizativ e bëri mirë punën duke treguar se shqiptarët dijnë të bashkohen për të mbrojtur të drejtat e tyre.
“Ne dëshirojmë që ky shtet të ridefinohet, të formatohet, të jetë i njëjtë për të gjithë qytetarët që jetojnë këtu”, tha Rexhepi.
Anëtari i Këshillit Koordinues të Lëvizjes BESA, Afrim Gashi, tha në fjalimin e tij se nuk e duan këtë Maqedoni që shqiptarin e trajton si të keqe të domosdoshme:“Nuk e duam këtë Maqedoni që na gjykon në Sopot.
Nuk e duam këtë Maqedoni që na gjykon me burg të përjetshëm si në rastin “Monstra”. Nuk e duam këtë Maqedoni që na përgjon dhe që përgjimet tona i përdorë për kalkulime politike”-tha ai për të shtuar se janë të zhgënjyer edhe nga përfaqësuesit politik shqiptarë që vetëm u kanë shërbyer maqedonasve për ta realizuar këtë diskriminim: Ne jemi të zhgënjyer prej atyre që duan vetëm t’i lidhin flamurët shqiptarë dhe maqedonas, ndërsa vazhdojnë t’i trajtojnë shqiptarët si pronë të maqedonasve”, tha ai.
Përfaqësuesi i familjarëve të të dënuarve për rastin “Monstra”, Bedri Ajdari, i bëri thirrje LSDM-së që sa më shpëjt t’i publikojë dëshmitë për rastin ‘Monstra”, ndërkohë protestuesit gjatë marshit të sotëm fajin kryesorë për mosrealizimin e të drejtave për shqiptarët ja kanë adresuar Ali Ahmetit dhe Menduh Thaçit.
Marshi i sotëm protestues u përkrah nga subjekte në dryshme politike dhe OJQ, ndërsa çuditrisht mungoi përkrahja e partive kryesore opozitare PDSH, Lëvizjes për Reforma në PDSH të cilën e kryeson Zijadin Sela dhe RDK-së.
/tesheshi.com/
