Në kuadër të sulmeve ndaj qeverisë, presidenti Meta “udhëroi” kabinetin Rama, a më saktë këtë të fundit, që të rimbursonte të gjithë ata të infektuar nga COVID-i që kanë marrë ose po marrin trajtim në shtëpi.
Me gjuhën tipike të një lufte tipike që ka zgjedhur të bëjë me qeverinë, e cila është ashpërsuar më tej me afrimin e zgjedhjeve, njeriu që mban kreun e shtetit shkruan se “qeveria duhet urgjentisht të rimbursojë pa asnjë vonesë të gjithë qytetarët, të cilët janë kuruar në shtëpi dhe t’u garantojë ilaçet falas të gjithë të infektuarve”.
“Dokrrat me ‘shëndetësinë falas’ dhe çdo demagogji tjetër duhet të marrin fund! Qytetarët nuk mund të lihen më në mëshirë të fatit përballë një virusi kaq të rrezikshëm, që vetëm dje mori 21 jetë, shifër rekord për numrin ditor të viktimave”, vijon Meta.
Më tej, ai sulmon Ramën dhe për veçimin e disa personaliteteve publike në vaksinim.
“Urgjentisht të bëhet transparent plani i vaksinimit masiv dhe jo ‘klasor’ i popullatës dhe të ndryshohet rrënjësisht strategjia anti-COVID”…, shkruan njeriu me statusin e Presidentit të Republikës. /tesheshi.com/
