Meta përbetohet se nuk do dalë nga Presidenca, si reagim i parë pas miratimit të komisionit hetimor që do merret me shkarkimin e tij.
Ai, me të njëjtën gjuhë si deri tani, e quan parlamentin njëpartiak e kësisoj si të paligjshëm inisiativën për shkarkimin e tij.
“Në këto kushte, bëjmë me dije se Institucioni i Presidentit të Republikës nuk do të njohë asnjë vendim apo veprimtari antikushtetuese dhe antiligjore të Kuvendit njëpartiak në detyrë, si dhe vendimet e çdo institucioni tjetër kukull të këtij regjimi kleptokratik.
Çdo produkt i një procesi fiktiv dhe antiligjor parlamentar, që bie ndesh me parimet dhe vlerat e shoqërisë sonë demokratike nuk meriton vëmendje dhe është nul”, shkruan Meta.
Për më tepër, ai aludon se pas inisiativës së radhës për shkarkimin e tij janë ndëkombëtarët (SHBA), të cilët i quan “mafie”.
“Presidenti Meta do të ushtrojë me përgjegjësi të plotë, sikundër ka vepruar derimë tani, të gjitha funksionet e Tij kushtetuese deri më 24 korrik 2022 dhe nuk do të tolerojë asnjë lloj intimidimi të Institucionit të Presidentit nga mafia lokale, rajonale dhe ndërkombëtare”, u tha nga Presidenca. /tesheshi.com/
