Për herë të parë, presidenti Meta ka folur mbi zgjedhjen e Arta Markut si Kryeprokurore e përkohshme, jo personalisht për të por për procedurëne ndjekur, që sipas tij ishte një shkelje kushtetuese.
“Për të mos folur pastaj për të gjitha zhvillimet që ju i dini, me zgjedhjen e Prokurorit të Përgjithshëm të Përkohshëm, që u zgjodh me 69 vota nga 84 vota që nevojiteshin, që e kishte mënyrën e zgjedhjes shumë të qartë Kushtetuta e Shqipërisë. Pra u bë një ligj për të dalë mbi Kushtetutën. Ju, jo vetëm ju, por kushdo që na ndjek, e di që është Kushtetuta, pastaj vijnë ligjet.
Këta shpikin një ligj për të dalë mbi Kushtetutën dhe përdorin 69 vota për të rrëzuar 140 vota, që ishin me konsensus të plotë për një reformë të vërtetë e për të sjellë një drejtësi të pavarur”, tha Meta në një emision televiziv kosovar, teksa kritikonte mënyrën e zbatimit në praktikë të Reformës në Drejtësi.
Zëvëndësimi i Adriatik Llallës në funddhjetorin 2018, të cilit i mbaronte mandati, me Arta Markun si Prokurore e Përgjithshme e Përkohshme, një gjetje juridike e mazhorancës, siç dihet pati si kulm dhe goditjen me çizme të kryemnistrit Rama, nga ana e bashkëshortes së kreut të shtetit, Monika Kryemadhi.
Prej atëherë e gjer më sot, Meta nuk kish folur për këtë zhvillim, që siç po e bëntë qartë pra, është një prej fitilave të luftës mes tij dhe mazhorancës.
Gjithashtu, kreu i shtetit i është rikthyer dhe ndryshimeeve kushtetuese të vitit 2008, një tjetër çarje e madhe mes tij dhe Ramës, pasi pretendonte se ato do eliminonin LSI-në nga skena politike. Në atë rast, Meta tentoi të sulmojë dhunshëm kryetaren e parlamentit, znj. Topalli, duke rrëzuar dhe vazot në podium, e më pas u ngujua brenda sallës me një grup deputetësh në kundërshtim të tyre.
“Rrënjët e kësaj krize që ka ndodhur apo që ka kulmuar kohët e fundit në Shqipëri, gjenden në ndryshimet e befasishme të Kushtetutës së Shqipërisë në vitin 2008, kur u ndryshua dhe sistemi zgjedhor dhe u vendos sistemi me listat e mbyllura, që praktikisht e ktheu vendin nga një Republikë parlamentare, në një Republikë kryetarësh, si dhe asgjësoi lidhjen e deputetëve me qytetarët dhe mundësinë e qytetarëve për të zgjedhur apo për të përkrahur atë deputet, te të cilët ata kishin besim që do të mbronin të drejtat e tyre”, tha Meta. /tesheshi.com/
