72-vjetorin e çlirimit të Tiranës, në luftën Antifashiste Nacional Çlirimtare, kryetari i kuvendit, Ilir Meta dhe kryebashkiaku, Erjon Veliaj e kanë cilësuar, si një moment reflektimi, për të ardhmen e vendit, drejt Bashkimit Evropian. Ata morën pjesë në në ceremoninë përkujtimore, që u zhvillua pranë monumentit të “Partizanit të Panjohur” në qendër të Tiranës.
Pasi vendosi një kurorë me lule, në nderim të dëshmorëve që dhanë jetën për çlirimin e Tiranës, Meta tha se kontributi i dhënë nga partizanët tregoi vlerat e popullit tonë në luftën anti-fashiste.
“Është kënaqësi e jashtëzakonshme të shohësh një ndërthurje të jashtëzakonshme brezash, nga veteranët e nderuar të Luftës Antifashiste Nacional Çlirimtare e deri te të rinjt e të rejat e kryeqytetit, që të nderojnë sot 17 nëntorin. Këtë ditë të madhe, jo vetëm për Tiranën, por për të gjithë vendin, që simbolizon ditën e çlirimit të kryeqytetit, njëkohësisht që përfaqëson edhe një nga betejat më të mëdha, më të përgjakshme të popullit tonë, të popullit të kryeqytetit dhe të partizanëve tanë gjatë Luftës së Dytë Botërore. Njëkohësisht është një nga demonstrimet më të mëdha të vlerave anti-fashiste të popullit tonë, të cilat sot pasohen nga vlerat e integrimit evropian”,- theksoi Meta.
Krahas kësaj, kryeparlamentari tha se vlerat për liri të treguara në Luftën Antifashiste Nacional Çlirimtare vijojnë të demonstrohen edhe sot në proceset integruese të Shqipërisë duke shtuar se ky përvjetor e gjen Shqipërinë një hap më pranë Bashkimit Evropian.
“Një proces që këtë 17 -nëntor Shqipërinë e gjen edhe me një hap tjetër përpara, gjë që është mjaft pozitive dhe mjaft domethënëse. Jam i bindur se ky 17 -nëntor është një mundësi shumë e mirë për të parë më me optimizëm drejt së ardhmes evropiane të vendin tonë, dhe padyshim të kryeqytetit, që luan një rol kryesor drejtues, si gjithmonë të proceseve transformuese të vendit tonë”,- theksoi Meta.
Ndërsa, kryetari i bashkisë së Tiranës, Erion Veliaj, tha se sot kërkohet që të ndërtojmë me të njëjtin pasion dhe të jemi me të njëjtën energji, ashtu si të rinjtë e 72 viteve më parë, që luftuan për të ruajtur dinjitetin e vendit.
“Siç e tha edhe Kryetari, ky është një moment i mirë. 72 vjet më parë negociuam qëndrimin tonë evropian, si pjesëmarrës të një aleance për të çliruar Evropën. Sot, jemi në prag të hapjes së negociatave dhe besoj që kemi hedhur një hap të sigurt për të qenë anëtarë të denjë, por edhe juridikisht të BE-së. Historia fillon me ata që themeluan qytetin, që luftuan për ta çliruar dhe me ata që sot po ndërtojnë qytetin”, – tha Veliaj.
Të pranishëm në këtë ceremoni ishin edhe deputetë, anëtar të Këshillit Bashkiak të Tiranës, si dhe përfaqësues të tjerë të pushtetit vendor.
Lufta për çlirimin e Tiranës ishte operacioni më i madh i shkallës operativo-strategjike i zhvilluar nga UNÇSH-ja për çlirimin e qyteteve. Në mëngjesin e 17 nëntorit të vitit 1944, pas 19 ditë e net luftë të ashpër e të pandërprerë, kryeqyteti i Shqipërisë, Tirana, u çlirua./tesheshi.com
