Nga Gjirokastra, presidenti i zgjedhur Ilir Meta, ka hedhur një sërë akuzash ndaj partisë me të cilën ka qeverisur këto 4 vjet.
Duke e akuzuar për afrimin e elementëve kriminalë në politikë, Meta ka hedhur hije dyshimi edhe mbi operacionin anti-drogë të kryer nga qeveria në Lazarat, në fillim të mandatit.
“Ai aksion nuk u bë për të shkulur drogën nga Lazarati dhe Shqipëria, por për të pastruar Lazaratin dhe për të mbushur gjithë Shqipërinë me drogë”, ka thënë Meta.
Meta ka kritikuar edhe mënyrën e funksionimit të brendshëm të aparatit të Partisë Socialiste, e cila sipas tij nuk ndjek parimet demokratike. Gjithashtu, Meta tha se Rama hoqi zgjedhjet brenda PS-së, duke iu referuar përplasjes së tij me Blushin.
“Cila parti në demokraci bën referendum që të ndalojë zgjedhjet në partinë e vetë?”, është shprehur Meta.
Ndësa vlen të theksojmë se deri më tani Meta nuk është futur në sinoret e PS-së. Por së fundi ka vendosur ta bëjë këtë gjë, duke zëvëndësuar Ben Blushin, me akuza tipike si të këtij të fundit, lidhur me zhvillimet brenda selisë rozë.
Në vijim të fjalës së tij, ish-kreu i LSI ka theksuar se kjo parti ka zgjedhur njeriun e duhur për Gjirokastrën dhe jo “kandidatë turistë”, si PS.
“Ne kemi këtu, në krye të një ekipi të mrekullueshëm, një person që i njeh hallet dhe nevojat e qytetarëve, Vangjel Tavo. Fuqia dhe madhështia e LSI-së qëndron tek respekti, kujdesi dhe dashuria për njerëzit. Ndërsa fuqia e rremë dhe mashtruese e Rilindjes qëndron vetëm tek arroganca që vjen nga pushteti dhe përbuzja e njerëzve të thjeshtë”, ka vijuar Meta./tesheshi.com/
