Sekretarja e Përgjithshme e PDIU-së, Mesila Doda, vijon replikat në distancë dhe përmes rrjeteve sociale me nënkryetarin e PD-së, Edmond Spaho.
Doda shkruan se kryetari i partisë së saj, Shpëtim Idrizi, nuk ndodhet në parlament për shkak të paktit të vjedhjes së votave mes PS dhe PD-së.
Me ironi, ajo shkruan se PDIU nuk është partia e vetëm që nuk e ka kryetarin e saj në parlament, pasi ende Lulzim Basha ndodhet jashtë tij.
Reagimi i Mesila Doda
Një shënim i fundit…
Për z. Spaho që me mirësjellje po na kujton marreveshjen e natës PD-PS
Nëse jeni i shqetësuar se pse nuk është në Parlament kryetari i PDIU, duhet t´a dini që ky është rezultat i pazarit të nates PS-PD. U dhanë 6 ministra teknikë dhe po aq drejtorë ekonomik që fushata po edhe numërimi dhe tjetërsimi i votës të përqëndrohej kundër partive të tjera, sepse le ta themi haptas… ky ishte pakti i dy të mëdhenjve kundër gjithë të tjerëve.
Për herë të parë u bënë bashkë PD e PS që të mos hapeshin kutitë e Tiranës e të mos dilte në shesh zullumi i gjithpërfshirjes në vjedhjen e votës në numërim, duke shënuar edhe rastin e parë kur një opozitë nuk dëshiron transparencë . Këto që po them janë fare pak në krahasim me atë të vërtetë që mbulon vjedhjen e mandatit të PDIU në Tirane, dhe kalimin e këtij mandati në favor të PS. Gjithsesi, për shqetesimin tuaj që kryetari nuk është në Parlament, më duhet t’ju kujtoj që edhe PD ende është në kohën kur kryetari i saj është jashtë parlamentit, ndaj nuk është as hera e parë e as e fundit që një kryetar partie nuk është në Parlament.
Nëse jeni shqetësuar pse nuk është sekretarja e përgjithshme e PDIU në Parlament, ju falenderoj që e ndjeni mungesën time, por nuk është fundi i botës. Nuk arriti as PD që është parti e madhe të fuste në Parlament sekretarin e saj të përgjithshëm. Tek e fundit edhe ju e dini që politikani që nuk është rritur me zor e që ka talent, di të bëjë politikë e të imponohet edhe kur nuk është në Parlament.
Për sistemin po, duhet të shqetesohesh sepse janë 40.000 vota shqiptarësh që mbeten pa përfaqësim. Kjo duhet të jetë pikënisja për ndryshimin e sistemit. Votë e barabartë dhe me të njëjtën peshë…
E kam edhe një shqetësim të fundit. Mos e konsideroni më shtetin fqinjë si yllin polar të demokracisë e mos ju servilosni. Ka probleme të medha me respektimin e të drejtave të njeriut dhe janë bashkombasit tuaj ata që janë vrarë, dhunuar e vjedhur në pronë e identitet. E më së fundi më duhet të them që nuk ka ardhur asgjë e mirë nga ky nënshtrim për shekuj me rradhë. /tesheshi.com/
