Zëvendëspresidenti i Shteteve të Bashkuara të Amerikës, Joe Biden, u ka bërë thirrje liderëve politikë në Kosovë që të ratifikojnë marrëveshjen e Demarkacionit me Malin e Zi dhe të mundësojnë krijimin e Asociacionit të Komunave Serbe në Kosovë.
Në konferencën e përbashkët për medie me presidentin Hashim Thaçi, ka thënë se Kosova nuk do ta humbë mbështetjen e SHBA-ve nëse nuk realizon këto marrëveshje, të cilat zëvendëspresidenti amerikan ka theksuar se do të kenë ndikim pozitiv në rajon.
“Dëshiroj të nënshkruani një marrëveshje me Mali e Zi. Është një marrëveshje e drejtë dhe kjo do të ketë ndikim pozitiv në rajon. Gjithashtu edhe Asociacionin e komunave serbe. Është dashur t’i shtyni përpara disa reforma, por vendimet e vështira sjellin fryte. Dhimbjet e luftës janë ende të freskëta. Të gjitha këto vragë janë të freskëta, por Kosova duhet të ecë përpara me një të ardhme të përbashkët, se të drejtat e qytetarëve janë të barabarta”, ka thënë Biden.
Biden: Korrupsioni po e pengon të ardhmen e Kosovës
Zv.presidenti amerikan, gjatë konferencës, ka kërkuar nga pushteti në Kosovë që të luftojë dukurinë e korrupsionit.
Ai ka thënë se korrupsioni po e dëmton të ardhmen dhe zhvillimin e Kosovës, duke kërkuar sistem të pavarur të drejtësisë, si mënyrë për t’i penalizuar të korruptuarit.
“Korrupsioni është një kancer. Çdo vend që përballet me korrupsion është përgjegjësi e qeverisjes së fundit. Mundësia për të ecur përpara, nuk do të jetë e vështirë në aspektin ekonomik, pa largimin e korrupsionit. Korrupsioni i pengon investimet e huaja, i dobëson mundësitë e shoqërisë, për atë që Kosova mëton të arrijë. Duhet që sistemi drejtësisë të forcohet”, ka deklaruar Biden.
Kurse, presidenti Hashim Thaçi, ka deklaruar se çështja e Demarkacionit do të përmbyllet shpejtë.
“Marrëveshja e Demarkacionit është marrëveshje e drejtë. Ky vendim i parlamentit të Kosovës do ta forcojë shtetësinë tonë, duke i hapur rrugë të sigurt integrimit euro-atlantik dhe lëvizjes pa viza.
Pa kalimin e Demarkacionit me Malin e Zi, dhe pa krijimin e Asociacionit të komunave serbe, Kosova do të mbetet e vetmuar dhe e izoluar nga bota, apo e lënë anash edhe nga SHBA-të, edhe nga Brukseli. Nuk mund të kërkojmë ndihmë nga askush nëse s’i kryejmë detyrat tona”, u shpreh Thaçi në konferencën për media me Bidenin. /tesheshi.com/
