Presidenti Meta e nisi ditën me një mesazh ironik ndaj kreut te qeverisë, duke ndërfutur në të dhe kundërshtinë tashmë të hapur ndaj Reformës në Drejtësi.
Meta ka luajtur me statusin “timonier” ndaj Ramës, duke vënë në lojë dhe reformën, atë që e votoi tre vite më parë (siç mund të shihet në foto), kohë kur ishin në aleancë, por që ç’prej atëhere, mu për shkak të saj nisi dhe çarja e madhe.
“Mirëmëngjes të dashur qytetarë!
Reforma apo Ramaforma? Kjo është çështja. Po çfarë është Ramaforma? Përgjigje e thjeshtë: Zbatimi ”krijues” i Reformës.
Timonieri ynë ka timon por s’ka frena, dhe si i tillë shquhet për “krijimtari” të papërmbajtshme.
Pas pak po e nisim me Kryereformën në drejtësi meqënëse pas pak ditësh nisim festimet për 3-vjetorin e miratimit të saj me 140 vota, duartrokitje dhe puthje të papërmbajtura”, shkruan Meta, gjithnjë nga pozita e Presidentit të Republikës.
Sipas Ramës, e gjithë ç’po ndodh që nga 2016-ta e derimë sot, përfshirë krizën e “çadrës” dhe këtë aktualen me djegien e mandateve dhe bojkotin e zgjedhjeve, ka si arsye luftën ndaj Reformës në Drejtësi, e cila sipas tij nxitet nga frika e krijimit të SPAK-ut,një lloj Prokuroria Speciale, e cila do merret fort me politikën dhe mëkatet e saj ndër vite. /tesheshi.com/
