Kryetari i Rezervës Federale të SHBA Jerome Powell paralajmëroi për një recesion të mundshëm të zgjatur si rezultat i pandemisë dhe i bëri thirrje Kongresit dhe Shtëpisë së Bardhë të veprojnë më tej për të parandaluar dëmtimin ekonomik afatgjatë.
Ai theksoi se planet e ndihmës emergjente janë “të shtrenjta”, por të pashmangshme nëse duhet të shmangin një recesion të thellë, raporton AFP.
“Mbështetja shtesë e buxhetit mund të jetë e shtrenjtë, por ia vlen përpjekja nëse na lejon të shmangim dëmtimin ekonomik afatgjatë, gjë që na lejon të kemi një rikuperim më të fortë,” tha Powell.
Rezerva Federale dhe Kongresi kanë ndërmarrë hapa në përpjekje për të parandaluar rënien e aktivitetit ekonomik për shkak të mbylljes së gjerë të ekonomisë amerikane, raporton AP.
Powell paralajmëroi se ende mund të ketë një numër të madh falimentimesh midis firmave të vogla dhe papunësi të zgjatur për shumë njerëz.
“Rimëkëmbja, më e ngadaltë se sa duam”
“Një recesion më i thellë dhe më i gjatë mund të linte dëme të qëndrueshme në kapacitetin prodhues të ekonomisë,” tha ai në deklaratat e përgatitura përpara një diskutimi në internet me Institutin Peterson për Ekonominë Ndërkombëtare.
Ai theksoi se mund të kalojë ca kohë para se të përshpejtohet rikuperimi ekonomik dhe se ka të ngjarë të nevojitet ndihmë shtesë për të luftuar efektet e koronavirusit.
“Kemi një përshtypje në rritje se rikuperimi do të jetë më i ngadaltë se sa duam ne,” tha Powell, por ai mendon se SHBA mund të kthehet mjaft shpejt.
Falimentimet e familjeve dhe të bizneseve që mund të shmangen mund të pengojnë rritjen me vite, tha ai, duke shtuar se qeveria amerikane duhet të bëjë atë që mundet për të shmangur rezultate të tilla, të cilat mund të kërkojnë masa të reja politike.
Powell tha se FED do të vazhdojë të përdorë mjetet e tij në maksimum derisa epidemia të qetësohet, por nuk tregoi cilat hapa mund të jenë. /tesheshi.com/
