Procesi i votimit në 175 mijë qendra në tërë Turqinë po shkon drejt fundit. Të parët që i kanë mbyllur votimet janë 32 rajone administrative në lindje të vendit, ku votimi ka nisur në 07:00, për t’u mbyllur në 16:00.
Ndryshe nga parashikimet, gjithçka ka shkuar qetë deri tani. Në Dijarbakër, qendra e kurdëve, nuk është regjistruar asgjë shqetësuese. Përpos kësaj, interesi te votuesit ka qenë i jashtëzakonshëm. Mes qyteteve të tjera që i kanë mbyllur votimet janë Gaziantepi dhe Erzurumi.
Presidenti i vendit, Rexhep Tajjip Erdogan, ka votuar në Stamboll, kurse kryeministri, Ahmet Davutogllu, e ka hedhur votën në Konja, në vendlindjen e tij.
Kryeministri do të lërë pak më vonë Konjën për t’u gjendur në Ankara, ku ka premtuar t’u flasë mbështetësve të AKP-së sonte në mbrëmje nga ballkoni i ndërtesës së partisë, sido që të jetë rezultati zgjedhor.
Mbi 54 milionë është numri i zgjedhësve në Turqi në këto votime, dhe pjesa e dërrmuese e tyre u janë drejtuar sot kutive të votimit për të zgjedhur 550 deputetët e rinj të Asamblesë së Madhe Kombëtare. Zgjedhjet në Turqi karakterizohen përgjithësisht nga një pjesëmarrje e gjerë.
Rezultatet e zgjedhjeve do nisin të mësohen në orët e para të mbrëmjes, ndërsa të drejtën për nisjen e dhënies së tyre në mjetet e informimit e ka organi që administron zgjedhjet në Turqi, Yüksek Seçim Kurulu. Zakonisht leja për dhënien e rezultateve jepet rreth dy orë apo tre orë pas mbylljes së kutive të votimit, kur edhe kanë nisur të përvijohen shifrat e para.
Duhet kujtuar se për shkak të zgjedhjeve, ndryshimi i orës në Turqi nuk është bërë javën e shkuar, por do të realizohet një javë më vonë. Kësisoj, nëse ora jonë lokale shënon 15:00, në Turqi është 17:00./tesheshi.com/
