Kryeministri i Kosovës Isa Mustafa ka zhvilluar sot një takim me kancelarin gjermane Angela Merkel. Në këtë takim diskutuar për marrëdhëniet bilaterale mes dy vendeve, situatën në Kosovë, raportet e Kosovës me BE-në, si dhe Dialogun Kosovë-Serbi.
Gjatë këtij takimi kancelarja Merkel i ka dhënë tri porosi kryeministrit Mustafa përkrahjen për Dialogun Kosovë-Serbi, kompromiset e nevojshme si dhe themelimin e Gjykatës Speciale.
Angela Merkel, ka folur edhe për çështjen e migrimit të shqiptarëve të Kosovës dhe vendosjen e tyre në Gjermani në fillim të këtij viti. Ajo ka thënç se nuk ekziston asnjë shans që të miratohet ndonjë kërkesë për azil për kosovarët.
Merkel ka folur edhe për raportet ndërmjet Kosovës dhe Serbisë, duke thënë se Gjermani ka një interes që të bëhen marrëveshje konstruktive dhe në interes të dy palëve.
“Kryeministri tha se ka ardhur koha edhe për kompromise. Kompromise duhet të bëjnë të dyja palët, jo vetëm Kosova, natyrisht edhe Serbia”. Unë i inkurajoj të dyja palët, sepse vetëm nëse kanë përparime atje (në dialog), kanë përparime edhe në rrugën evropiane. Kjo vlen edhe për Serbinë, edhe për Kosovën”, ka thënë Merkel.
Ndërkaq kryeministri i Kosovës, Isa Mustafa, ka thënë se në takim me kancelaren gjermane, Merkel, kanë diskutuar për marrëdhëniet bilaterale midis dy vendeve, situatën në Kosovë si dhe për raportet me BE-në.
“Kancelarja na ka dhënë përkrahjen e plotë që të përparojmë më tutje procesin e Dialogut me Serbinë dhe po ashtu t’i përmbushim obligimit tona sa i përket themelimit të Gjykatës Speciale”, ka thënë Mustafa.
“Kemi biseduar për çështjet themelore që e preokupojnë Kosovën dhe BE-në, çështjet zhvillimore, integrimin evropian dhe përmbushjen e kritereve tona për nevojën e luftimit të krimit dhe korrupsionit – si një nga kriteret që ne duhet përmbushur për liberalizimin e vizave”, ka deklaruar Mustafa./tesheshi.com/
Përgatiti: Bashkim Kastrati
