Kancelarja gjermane ka shfrytëzuar dje një konferencë shtypi për të folur dhe për zhvillimet më të fundit në Siri. Ndërhyrja ruse me sulme ajrore në Siri dhe vizita e papritur e Beshar Esadit një natë më herët në Moskë kanë trazuar shumë ujëra në politikën botërore.
Merkel në fjalën e saj e ka përjashtur tërësisht një rol politik të Esadit në të ardhmen politike të Sirisë. “Ka një njeri, të tillë si Esadi, që sigurisht nuk do të ketë një të ardhme politike në vend,” është shprehur ajo. “Ai duhet të ndalojë goditjen e popullit të tij me bomba,” ka bërë thirrje kancelarja.
Gruaja më e pushtetshme në Gjermani dhe në Europë e ka nxitur Rusinë që të punojë për një zgjidhje politike dhe t’i drejtojë operacionet ushtarake kundër ISIS-it.
Ajo e vuri theksin te përpjekjet ndërkombëtare për t’i dhënë fund konfliktit në Siri, megjithëse e bëri të qartë se nuk pritet shpejt diçka pozitive, “Ne po përpiqemi të përdorim mjetet tona për të sjellë një zgjidhje paqësore në Siri. Por duket se ky objektiv nuk mund të arrihet shumë shpejt.”
“Një zgjidhje politike është absolutisht thelbësore. Çfarë ne duhet të bëjmë është t’i zvogëlojmë sa të jetë e mundur vuajtjet e popullit sirian.” /tesheshi.com/
