Jurgis Çyrbja, ish-deputeti socialist i Durrësit, si dhe ish-Drejtor i Hipotekës aty, duket se është rast tipik i mpleksjes së turpshme dhe të patolerueshme të politikës me krimin.
Prej orësh ai është pas hekurave me urdhër nga SPAK. Sipas një deklarate sqaruese mbi akuzat që rëndojnë mbi të, ky njeri i shërbente krimit dhe mbahej nga krimi.
Jurgis Çyrbja është ndër ata që ka rënë viktimë e aplikacionit të enkriptuar Sky EÇ, të cilin e ka shfrytëzuar për komunikim me figurat e njohura të krimit në Durrës, posaçërisht në Shijak, duke patur një lloj ortakërie me Altin Hajrin, një emër famëkeq që prej vitesh është në kërkim nga Policia, pasi akuzohet për ekzekutimin dhe zhdukjen e shtetasit Jan Prenga. Altin Hajri është pronar i vilës “Golden” në Shijak, një strofull e njohur krimi në zonë.
Por cilat janë mëkatet e këtij njeriu politik, gjithsesi periferik, por që dhe njëherë kompromenton rëndë qeverisjen socialite?
Sipas asaj çfarë sqaron SPAK, Çyrbja ka luajtur rolin e informatorit për persona në kërkim, pra, duke dekonspiruar operacionet e Policisë, pasi ka shtënë në dorë informacione të klasifikuara si “sekrete shtetërore”.
“Nga hetimet e kryera, ka rezultuar se aktet sekrete me anën e të cilave është vënë në dijeni personi nën hetim J.Ç., konfirmonin faktin se bashkëbiseduesit e aplikacionit të enkriptuar Sky EÇ ishin persona të shpallur në kërkim ndërkombëtar dhe ky informacion rreth përmbajtjes së dokumenteve dhe akteve që sipas ligjit përbëjnë sekret shtetëror, i është transmetuar pikërisht personave të shpallur në kërkim.
Personi nën hetim J.Ç., është vënë në dijeni edhe të disa planeve operacionale të Policisë së Shtetit, lidhur me kontrollet që do zhvilloheshin në zonën e Durrësit, me qëllim për të kapur personat e shpallur në kërkim dhe ky informacion rreth përmbajtjes së dokumenteve dhe akteve që sipas ligjit përbëjnë sekret shtetëror u është transmetuar personave të shpallur në kërkim, si drejtpërdrejtë prej tij, ashtu edhe përmes angazhimit të personit tjetër nën hetim A.M., me qëllim për të mundësuar njoftimi i personave të shpallur në kërkim, duke konsumuar elementët e veprës penale ‘Tregimi i sekretit shtetëror nga shtetasit’.
Informacionin që personat nën hetim J. Ç., dhe A. M., u kanë transmetuar personave të shpallur në kërkim ndërkombëtar ka shërbyer si një e dhënë e rëndësishme që këta persona të qëndronin të fshehur me qëllim që t’i shpëtonin kapjes apo arrestimit të mundshëm nga strukturat e Policisë së Shtetit, duke konsumuar elementët e veprës penale ‘Përkrahja e autorit të krimit’, thuhet nga SPAK.
Po ashtu, Çyrbja është vënë në shërbim të plotë të Altin Hajrit, për ta shpëtuar këtë të fundit nga përgjegjësitë penale. Dhe si shpërblim do merrte nga Hajri mbështetjen për sigurimin e mandatit të deputetit.
“Po ashtu nga hetimi i këtij procedimi penal ka rezultuar se personi nën hetim J. Ç., në kohën e kryerjes së veprave penale ka qenë deputet i Kuvendit të Shqipërisë, i cili ka patur një marrëdhënie miqësore me personin tjetër nën hetim A. H., i shpallur në kërkim ndërkombëtar për kryerjen e veprave shumë të rënda penale.
I hetuari J.Ç., për shkak të funksionit të tij si deputet i ka ofruar favorizime të ndryshme të hetuarit të shpallur në kërkim ndërkombëtar, A.H., duke ndërhyrë në agjenci të ndryshme të zbatimit të ligjit në Shqipëri, me qëllim favorizimin e tij apo të lidhjeve të ngushta familjare e shoqërore, duke konsumuar elementët e veprës penale ‘Korrupsioni aktiv në zgjedhje’.
Nga ana tjetër personi nën hetim A. H., në këmbim të këtyre favoreve të siguruara nga i hetuari J.Ç., i ofronte këtij të fundit që të votonte si dhe të siguronte votues në funksion të mbështetjes së tij si kandidat për deputet në Qarkun e Durrësit, në zgjedhjet parlamentare të vitit 2021, duke konsumuar elementët e veprës penale ‘Korrupsioni pasiv në zgjedhje’”, thuhet nga SPAK. /tesheshi.com/
