Mafia shqiptare, pas kontrollit të heroinës po merr në dorë edhe trafikimin e shpërndarjen e drogës që vjen nga Amerika Latine dhe Afrika-kokainën.
Është policia e kantonit të Gjenevës, e cila ka bërë të ditur këtë ndryshim cilësor në hartën e kriminalitetit në Zvicër.
Sipas policisë, grupet kriminale nga Shqipëria, Maqedonia dhe Kosova po i marrin terren mafies afrikano-perëndimore, veçanërisht nigerianëve.
Policia e kantonit të Gjenevës thekson se ka dy vjet që shqiptarët po shesin gjithnjë e më shumë kokainë.
Jean-Philippe Brandt, zëdhënës i policisë kantonale deklaroi për gazetën në gjuhën gjermane “20 minuten” se “treguesit e parë për këtë ndryshim në hartën e krimit kanë ardhur që në vitin 2013.
Por gjatë muajit prill të këtij viti, në një goditje të vetme, policia arriti t’i sekuestrojë mafies shqiptare 17 kilogramë heroinë dhe një kilogram kokainë në kufirin me Francës pranë Gjenevës si dhe në kantonin e Thurgau-t.
Në muajin korrik, u kap një tjetër tregtar shqiptar droge, i cili përveç heroinës ishte “pajisur”, si mall për ta shitur edhe me kokainë. Gjithashtu edhe në kantonet e Bernës dhe Saint Gallen ka pasur rezultate të ngjashme.
Pikërisht në kantonin e Bernës është vënë re një ndryshim rrënjësor në tregun e trafiqeve të lëndëve narkotike. “Specialistët e policisë kantonale të Bernës, bëjnë të ditur se tashmë shqiptarët e lindur në Zvicër po kontrollojnë edhe trafikun e kokainës”, thekson Andreas Hofmann zëdhënës i Policisë të kantonit të Bërnës.
Në kantonin e Saint Gallen, shqiptarët janë shumë të fortë në trafikun e heroinës. Zëdhënësi i policisë, Hanspeter Krusi thekson se: “Megjithatë ka grupe që veproojnë në një shkallë të vogël edhe në trafikun e kokainës”.
Në Gjenevë, policia ka analizuar se ky ndryshim vjen ngaqë heroina po e humb gjithnjë e më shumë pëlqimin nga konsumatorët.
“Më popullorë janë kokaina dhe kanabisi”, thekson Brandt. Ulja e çmimeve të heroinës kanë rënë nga 20 franga për gram.
Brand shton se për kokainën konsumatori do të duhet të paguajë 5 herë më shumë, pra 100 franga për gram. Megjithatë policia thekson se ka arsye të tjera që shtyjnë më shumë se sa çmimi në këtë ndryshim të situatës.
Në raportin e tij vjetor të vitit 2014, Zyra Federale e Policisë, thekson se në vitet e fundit është rritur numri i shqiptarëve të shpallur fajtorë, në mënyrë të veçantë në trafikun e lëndëve narkotike.
Në këtë raport të vitit të kaluar, theksohet se “Përveç trafikut të heroinës shqiptarët po merren me tregtimin në pakicë të kokainës, gjithsesi në masë të vogël”. Sipas policisë, gjasat janë se mafia shqiptare po kërkon një klientelë të re dhe një terren të ndryshëm nga ai i pari.
Tregëtia e rrugës në Gjenevë do të vazhdojë të mbetet në duart e afrikanëve. Shqiptarët po përqendrohen në një klientelë më të pasur.
Jean-Philippe Brandt thekson se “Ka shumë mundësi që të ardhurat vijnë nga qarkullimi monetar në aktivitetin e jetës së natës dhe në botën e kumarit, ku qarkullojnë njerëzit e pasur që vijnë nga katër anët e botës në Zvicër për biznes me bankat, dhe më pas xhirojnë shuma marramendëse në klubet e natës, kazinotë dhe në biznesin e prostitucionit”.
/tesheshi.com/
