Mediat serbe njoftojnë se sot kryeministri shqiptar Edi Rama do të zhvillojë një takim me krerët e shërbimeve inteligjente për ndeshjen që do të zhvillohet në Shkodër ndërmjet përfaqësuesve të Shqipërisë dhe Serbisë.
Siç bën të ditur portali serb “Alo”, më shumë se një tifoz serb po bën përpjekje për të sjellë një dron me simbole serbe në takimin e 8 tetorit në stadiumin “Loro Boriçi”, tashmë të rindërtuar.
Mediat serbe theksojnë se shqiptarët janë duke u përgatitur për ndeshjen në stadiumin “Loro Boriçi”, e cila do të mbahet më 8 tetor në kualifikimin për Kampionatin Europian, sepse ata shpresojnë që fitorja të vulosë kualifikimin e drejtpërdrejtë në Francë.
Kryeministri Rama ka planifikuar për ditën e sotme një takim në Tiranë me presidentin e FSHF-së, Armando Duka, ministrin e Brendshëm Sajmir Tahiri, atë të Jashtëm Ditmir Bushati, si dhe krerët e agjencive të inteligjencës, për të diskutuar organizimin e përballjes në Shkodër.
Alo thekson se ndeshja e Shkodrës është cilësuar një takim me rrezikshmëri të lartë, dhe qëllimi është që të organizohet një ndeshje në përputhje me standardet më të larta europiane. Stadiumi në Shkodër është ende duke u rinovuar, por shqiptarët presin që gjithçka të jetë në rregull për duelin me skuadrën serbe, e cila quhet nga tifozat dhe mediat si “Shqiponjat”.
Në 8 tetor në Shkodër parashikohet të jenë prezentë 20.000 tifozë. Sipas një marrëveshjeje mes FSHF-së dhe Federatës Serbe të Futbollit, në ndeshjen e Shkodrës do të jenë edhe një numër i kufizuar i tifozëve nga Serbia. Portali Alo thekson në fund të shkrimit se “më shumë se një serb ka në mendje ngritjen e një droni me simbolet serbe në stadiumin “Loro Boriçi”.
/tesheshi.com/
