Tek një pjesë shqiptarësh, sidomos të atyre që jetojnë në Kosovë dhe Maqedoni, ka ekzistuar ideja se Edi Rama është grek, në mos me gjak, me preferenca politike. Por ja që së fundi është vetë Greqia që po krijon mitin tjetër: atë të Edi Ramës nacionalist i rrezikshëm, me fjalë të tjera një shqiptaromadh që rend drejt një Shqipërie të madhe në Ballkan, edhe me ndihëm e Erdoganit.
Kjo është pakashumë fryma e një shkrimi të fundit të gazetës greke “To Vima”, e cila ka sulmuar ashpër kreun e qeverisë shqiptare, duke shkruar se Rama po provokon trazira në Ballkan me qëndrimet e tij nacionaliste. Sipas gazetës në fjalë, kjo nisi që me ndeshjen Serbi – Shqipëri, me dronin famshëm pra, ku Beogradi akuzoi vëllanë e kryeministrit shqiptar, Olsi Ramën, si autor të dronit ku shpalosej një flamur i sajuar nga një delir nacionalist.
Përkundër gjithë këtyre, kundërshtarët e Ramës e kanë akuzuar ndër të tjera atë dhe si një kozmopolit të cilit i mungon atdhetarizimi. Por ky është Ballkani!
