Ish-presidenti serb, Boris Tadiç, pritet të hyjë në garën e zgjedhjes së sekretarit të Përgjithshëm të OKB-së, kjo, sipas gazetave serbe, që i bëjnë jehonë kandidimit të tij.
“Veçernje Novosti” shkruan se ish-kreu i shtetit serb ka nisur të lobojë pranë shteteve të mëdha për të siguruar mbështetje për kandidimin e mundshëm për shef të OKB-së.
Së fundmi, Tadiç ka kërkuar mbështetje në Francë, ku ka pasur më së shumti “miq” në kohën që qeveriste. Nëse ai ia arrin qëllimit, rruga e Kosovës drejt OKB-së vështirësohet. A ka vend për shqetësim?
Gara për kreun e OKB-së në fakt nuk është e thjeshtë, pasi kombinohen një sërë faktorësh për përzgjedhjen e figurës së duhur.
Ambicja e Tadiç duket se nxitet nga bisedimet më të fundit në Davos ku u diskutua edhe përzgjedhja e pasardhësit të Ban ki-Moon, mandati i të cilit përfundon vitin e ardhshëm.
Mes kritereve, edhe balanca gjeografike është e rëndësishme. Mes pesë rajoneve që rotacioni i postit të lartë mendohet se respekton, Europa Lindore është e vetmja që nuk ka nxjerrë kurrë një sekretar të Përgjithshëm të OKB-së dhe në këto shtete është rritur pritshmëria për marrjen e një posti të tillë.
Por, kriteri më i vështirë dhe që e përmbushin pak ose aspak politikanë në botë është se kandidati i suksesshëm duhet të jetë i pranueshëm për të pestë anëtarët e përhershëm të Këshillit të Sigurimit të OKB-së. Një gjë e tillë është provuar se nuk është aspak e lehtë.
Për më tepër, aktualisht, Këshilli i Sigurimit është më i ndarë që nga Lufta e Ftohtë, e Rusia dhe Shtetet e Bashkuara janë tepër të ndjeshme në përzgjedhjen e kandidatëve. /tesheshi.com/
