Turqia ka rritur ndjeshëm kapacitetin kombëtar industrial gjatë dhjetë viteve të fundit dhe ka lënë vende si Franca prapa në prodhimin e droneve, raportojnë media franceze.
Gazeta franceze L’Opinion ka botuar një shkrim ku prek operacionin e Turqisë “Mburoja e Pranverës” në veri të Sirisë, duke thënë se Turqia ka filluar operacionin për të parandaluar që regjimi i Bashar al-Asad të kapë Idlibin.
Gjithashtu theksohet se Turqia filloi operacionin në përputhje me standardet e NATO-s.
“Në shtatë ditët e fundit, Turqia ka treguar në një mënyrë shumë të habitshme kapacitetin e saj në fushën e droneve ushtarake. Turqia ka zhvilluar një industri të fuqishme kombëtare ushtarake në dhjetë vitet e fundit dhe është shumë e qartë se ka kapërcyer vendet si Franca në këtë fushë,” thuhet në shkrim.
Është theksuar gjithashtu se këto janë dronë të armatosur me madhësi më të vogël se ato të përdorura nga ushtria franceze, por që janë shumë më të lira dhe më efikase.
Gazeta franceze gjithashtu kujton se Turqia aktualisht po prodhon edhe dronë me kapacitet më të lartë, dhe se ushtria turke ka vërtetuar se, falë aftësive të saj elektronike të luftës, se mund të kryejë operacione pa mbështetjen e Rusisë. /tesheshi.com/
